Ulaanbaatar
ДЭМБ: H5N2 вирусний халдвараар хүн нас барсан анхны тохиолдол бүртгэгдлээ
ДЭЛХИЙН МЭДЭЭ | ЭРҮҮЛ МЭНД
ЖЕНЕВ, 2024 оны зургаадугаар сарын 6 /VOA/. Мексикт шувууны томуугийн H5N2 вирусээр халдварласан хүн нас барсан талаар Дэлхийн эрүүл мэндийн байгууллагаас /ДЭМБ/ лхагва гарагт мэдэгджээ.
Халуурах, амьсгал давчдах, гүйлгэх, дотор муухайрах зэрэг шинж тэмдэг илэрч байсан өвчтөн дөрөвдүгээр сарын 24-нд нас барсан бөгөөд тэрбээр “шувууны аж ахуй болон бусад амьтадтай ойр байгаагүй” боловч “архаг хууч эмгэгтэй байсан” гэж ДЭМБ мэдээлжээ.
Мексикийн эрүүл мэндийн байгууллагын удирдлагуудын мэдээлснээр, 59 настай өвчтөнийг Мехико хотын эмнэлэгт хүргэгдсэний дараа вирусний халдвар авсан нь батлагдсан талаарх мэдээллийг ДЭМБ-д тавдугаар сарын 23-нд хүргүүлжээ. ДЭМБ-аас мэдэгдсэнээр, шувууны томуугийн A хүрээний H5N2 вирусний халдвар авсан нь лабораторийн шинжилгээгээр батлагдсан өвчтөн нас барсан дэлхийн анхны тохиолдол энэ болжээ.
Уг өвчтөн хаанаас халдвар авсан нь тодорхойгүй байгаа хэдий ч тус улсын шувууны аж ахуйд H5N2 вирусээр халдварласан тохиолдлууд бүртгэгдсэн гэж ДЭМБ-ын мэдэгдэлд дурджээ. Тухайлбал, гуравдугаар сард Мичоакан мужийн шувууны аж ахуйд H5N2 халдварын тохиолдлууд илэрч, Мехико мужид мөн дэгдэлт бүртгэгдсэн байна.
Гэхдээ хүн халдварласан тохиолдол болон шувууны аж ахуйд бүртгэгдсэн тохиолдлуудын хооронд одоогоор ямар нэгэн холбоо хамаарал тогтоогдоогүй тул хүмүүст учрах эрсдэлийг “бага” гэж ДЭМБ-ын шинжээчид үзэж байгаа ажээ.
Үүнээс гадна шувууны томуугийн өөр хувилбар болох H5N1 нь АНУ-ын саалийн үнээний дунд олон долоо хоногийн турш тархаж, хүмүүсийн дунд цөөн тооны тохиолдол бүртгэгджээ. Гэхдээ эдгээр тохиолдлын аль нь ч хүнээс хүнд халдварлаагүй, харин үхрээс хүнд халдварласан гэж эрх баригчид мэдэгдсэн байна.
