Ulaanbaatar
Ё.Баатарбилэг: Нийслэлд шинэ сургууль, цэцэрлэг барихад газрын асуудал маш хүнд
МОНГОЛЫН МЭДЭЭ | БОЛОВСРОЛУлаанбаатар /МОНЦАМЭ/. БСШУС-ын сайд Ё.Баатарбилэг нийслэлийн Баянзүрх дүүргийн 26 дугаар хорооны нутаг дэвсгэрт байрлах 133 дугаар сургуулийн сурагчдын эцэг, эхийн төлөөллийг хүлээн авч уулзлаа.
Уулзалтаар эцэг, эхийн төлөөлөл Монгол тэмүүлэл, 133 дугаар
дунд сургууль нэг байранд байрлах боломжгүй учраас барилга байгууламжийн
асуудлыг шийдвэрлэж салгах, 133 дугаар сургуулиас гадна тус хорооны нутаг
дэвсгэрт дахин шинэ сургууль, цэцэрлэг барих асуудлыг шийдвэрлэж өгөхийг уламжиллаа.
Тэдний тавьсан хүсэлтэд БСШУС-ын сайд хариу
тайлбар мэдээлэл өгсөн юм. Тэрбээр, “Засгийн газрын 2019 оны үйл ажиллагааны
хөтөлбөрт ирэх хичээлийн жил эхлэхэд гурван ээлжээр хичээллэж байгаа сургуулийн
асуудлыг бүрэн шийдвэрлэсэн байх зорилт тавьсан. Энэ хүрээнд боловсролын
салбарын хөрөнгө оруулалтын ажлыг эрчимжүүлэхэд яамнаас онцгой анхаарч байгаа.
133 дугаар сургууль, Монгол тэмүүлэл сургуулийн хувьд нэг байранд байх
нь хүндрэлтэй гэдэгтэй санал нэг байна. Улаанбаатар хотод шинээр сургууль,
цэцэрлэг барихад газрын асуудал маш хүнд байгаа. Тиймээс сайдаар томилогдсон даруйдаа
сургуулийн зориулалтаар ашиглах боломжтой түрээсийн барилга байгууламжийн
судалгаа хийх ажлыг эхлүүлсэн. Ирэх хичээлийн жил эхлэхэд аль нэг сургуулийг
түрээсийн байранд түр шилжүүлсэн байхыг зорьж байна.
26 дугаар хороонд хүн амын тоон үзүүлэлтийг харсан ч шинэ сургууль, цэцэрлэг барихаас аргагүй байгаа. Миний бие Нийслэлийн Засаг дарга болон холбогдох албаныхантай 26 дугаар хороонд газар дээр нь очиж танилцсан. Нийслэлд газрын асуудлыг яаралтай шийдвэрлэх чиглэл өгсөн” гэв.
Уулзалтад Нийслэлийн Засаг даргын орлогч Ш.Анхмаа, БСШУСЯ-ны Ерөнхий боловсролын бодлогын газрын дарга Т.Ням-Очир, Нийслэлийн боловсролын газрын дарга Ж.Гантулга болон бусад албаны хүмүүс байлцав.
