Ulaanbaatar
Гүржид эртний хүний эрүүний ясны үлдэгдэл олджээ
ДЭЛХИЙН МЭДЭЭ | ШИНЖЛЭХ УХААН
ТБИЛИСИ, 2025 оны наймдугаар сарын 28 /Reuters/. Гүржийн археологичид эртний хүний төрөл зүйлд хамаарах 1.8 сая жилийн настай эрүүний ясыг олсон нь Еврази дахь балар эртний хүмүүсийн суурьшлын талаарх судалгаанд чухал хувь нэмэр оруулна гэж үзэж байна.
Түүхэн олдвороор баялаг Орозмани хэмээх газар дахь хоёр машины
зогсоолоос жижиг малтлагын талбайгаас хамгийн эртний
хүмүүсийн олдворууд /Африкаас өөр газраас олдсон/ олдож байгаа бөгөөд эдгээр нь хоёр сая жил орчмын тэртээгээс нүүдэллэж эхэлсэн “Хомо эректус”-ын талаарх мэдээллийг судлахад тус дөхөм болно.
Тбилисийн Илья их сургуулийн чулуун зэвсгийн үеийн археологийн тэнхимийн профессор Гиорги Бидзинашвили хэлэхдээ, Орозманигаас олдсон эртний хүн, чулуужсан амьтны үлдэгдлүүдийг судлах нь Евразийн анхны колоничлогчдын амьдралын хэв маягийг тодорхойлох боломжийг бидэнд олгож байна гэлээ. “Орозмани бидэнд хүн төрөлхтний талаарх томоохон мэдээллийг өгч чадна гэж бид бодож байна” хэмээн тэрбээр нэмж хэлэв.
Доод
эрүүний ясыг Гүржийн нийслэл Тбилиси хотоос баруун өмнө зүгт 100 км орчмын зайд байх газраас олсон бөгөөд
археологичид эндээс 2022 онд дээр дурдсан цаг үед хамаарах эртний
хүмүүсийн шүдийг олж байжээ. Түүнчлэн ойролцоох Дманиси
тосгоноос 1.8 сая жилийн тэртээ амьдарч байсан хүний гавлын яс олдсон байна.
Хамгийн сүүлийн үеийн олдворыг олох явцдаа археологичид мөн сэлэм шиг шүдтэй бар, заан, чоно, буга, анааш зэрэг амьтдын олдвор, мөн чулуун зэвсгийн агуулахыг олжээ. Эрүүний яс болон амьтны олдворуудыг сайтар судалснаар хүн төрөлхтөн Африкийг орхисны дараа хэрхэн үүссэн, тэр дундаа юу идэж байсан, уур амьсгал ямар байсан зэргийг судлах боломжтой. Археологичид Орозмани дахь малтлагын талбайгаас жил бүр “Хомо эректус”-ын шинэ үлдэгдлийг илрүүлж байгаа ажээ.
