Ulaanbaatar
НҮБ-ын тэргүүн, Украины Ерөнхийлөгч нар утсаар ярьжээ
ДЭЛХИЙН МЭДЭЭ | УЛС ТӨР
НЬЮ-ЙОРК, 2025 оны наймдугаар сарын 29 /Anadolu/. НҮБ-ын Ерөнхий нарийн бичгийн дарга Антонио Гутерриш пүрэв гарагт Украины Ерөнхийлөгч Владимир Зеленскийтэй утсаар ярьж, дайныг зогсооход чиглэсэн дипломат хүчин чармайлтыг хэлэлцжээ.
НҮБ-ын тэргүүний хэвлэлийн төлөөлөгч Стефан Дюжаррикийн мэдэгдсэнээр, Ерөнхий нарийн бичгийн дарга болон Ерөнхийлөгч нар Украины дайныг зогсоох чиглэлд гаргаж буй сүүлийн үеийн дипломат хүчин чармайлтын талаар хэлэлцсэн байна.
“Дипломат ажиллагааны эрчмийг хадгалахын ач холбогдлыг” А.Гутерриш онцлон тэмдэглээд, НҮБ-ын Дүрэм, олон улсын хууль тогтоомж, НҮБ-ын
холбогдох тогтоолуудын дагуу Украинд шударга, иж бүрэн, тогтвортой энх тайван
тогтоох эхний алхам буюу нэн даруй, нөхцөл болзолгүйгээр бүрэн хэмжээгээр гал зогсоохыг дэмжиж буй НҮБ-ын байр суурийг дахин нотолжээ. Ерөнхий нарийн бичгийн дарга мөн Украины хүмүүнлэгийн хэрэгцээг шийдвэрлэх, сэргээн босгох ажлыг дэмжих НҮБ-ын амлалтыг дахин нотолсон байна.
Украины талын мэдээлснээр, пүрэв
гаргийн өглөө Оросоос Киев рүү довтолсны улмаас 14 хүн, тэдний дотор гурван хүүхэд амиа алдаж, 48 хүн шархаджээ. Өглөө хийсэн цохилтын үр дагавар нийслэлийн
найман дүүрэгт бүртгэгдсэн гэж Киев хотын прокурорын газар мэдэгдсэн байна. Дарницкий дүүрэгт таван давхар орон сууцны нэг хэсэг нурсан
бөгөөд нурангид дарагдсан
хүмүүсийг эрэн хайх-аврах ажиллагаа үргэлжилж байна. Түүнчлэн ойролцоох өндөр барилгуудын цонх
хагарч, авто машинууд, хувийн орон сууцнууд
эвдэрч сүйджээ.
