Байгаль хамгаалагчдын цалинг нэмэх саналаа танилцуулав

МОНГОЛЫН МЭДЭЭ | БАЙГАЛЬ ОРЧИН
sodonizm@gmail.com
2020-08-06 17:15:04

Улаанбаатар/МОНЦАМЭ/. БОАЖ-ын сайд Д.Сарангэрэл Улсын хэмжээнд тусгай хамгаалалттай 34 газрын хамгаалалтын захиргааны удирдлагуудыг өнөөдөр хүлээн авч уулзлаа. 

Уулзалтаар байгаль орчин, аялал жуулчлалын салбарт тулгамдаж байгаа асуудал, тэдгээрийг хэрхэн шийдвэрлэх, мөн одоогийн мөрдөгдөж байгаа хууль тогтоомж, дүрэм журамд өөрчлөлт оруулах талаар хэлэлцсэн байна. Түүнчлэн Засгийн газрын түвшинд анхаарах шаардлагатай салбарын 10 гол зорилтыг дарга нарт танилцуулж санал сэтгэгдэл солилцжээ.

10 зорилтод Улаанбаатар хотын агаарын бохирдлыг 80 хувь хүртэл бууруулах, Хөвсгөл нуураа хамгаалах, тэр дундаа хөрсний бохидлын асуудалыг нэн тэргүүнд шийдвэрлэх, нийслэлийн цэвэр усны асуудлыг шийдвэрлэх, гэр хороолол, аялал жуулчлалын бүсэд “Эко жорлон” хөтөлбөр хэрэгжүүлэх асуудал багтжээ. Мөн Тогтвортой хөгжлийн үзэл баримтлалын хэрэгжилтэд анхаарал хандуулах, цэнгэг усны нөөц, гол мөрний 55 хувийг хамгаалалтад авах, ховордсон ургамал, ан амьтдыг зориудаар өсгөх, бий болгох, уул уурхайн ажлын улмаас сүйтгэгдсэн газар нутгуудад нөхөн сэргээлтийн ажлыг нэн даруй хийх, хог хаягдлын асуудлыг ахисан түвшинд шийдвэрлэх, Туул голын нөхөн сэргээлтийг хийх, хог хаягдал хөрсний бохирдлын асуудлыг шийдвэрлэх асуудал багтсан байна.

Энэ үеэр Хөвсгөлийн Улаантайга УТХГ-ын дарга Ж.Төмөрсүх “Байгаль хамгаалагчдын нийгмийн асуудал тэр дундаа харилцаа холбооны асуудал амаргүй байна. Байгаль хамгаалагч хүн олон хоногоор хээр хөдөө, уул усаар явдаг. Тийм үед албан газар, гэр бүлийнхэндээ хаана, яаж яваагаа дуулгаж чаддаггүй. Холбоогүй олон хоног явахад ар гэр санаа зовохоос эхлээд асуудал их" гэсэн юм.

Мөн 1990-ээд онд батлагдсан Тусгай хамгаалалтын хууль нь дэндүү хоцрогдсон, олон зүйл заалтыг өөрчлөх шаардлагатай байна. Улсын тусгай хамгаалалтын газрын дарга нар байгаль хамгаалагчдын цалинг нэмэх, харилцаа холбооны асуудлыг шийдвэрлэх, эрүүл мэндэд анхаарал хандуулах, тэтгэвэрийн насыг 55-аар тогтоох, самар хураалтыг хойшлуулах зэрэг асуудлыг шийдвэрлэх шаардлага тулгараад байгааг салбарын сайдад уламжилсан юм.

Related news