Ulaanbaatar
АНУ-ын хориг БНСУ-ын чипийн экспортод нөлөөлж болзошгүй
ДЭЛХИЙН МЭДЭЭ | ЭДИЙН ЗАСАГ
СӨҮЛ. /Yonhap/. АНУ-ын засаг захиргаанаас БНХАУ-ын “Huawei” компанийн эсрэг авсан хориг арга хэмжээнүүд БНСУ-аас БНХАУ руу гаргах чипийн экспортод нөлөөлж болзошгүй байна гэж эх сурвалжууд өнөөдөр мэдээлжээ.
АНУ-ын тоног
төхөөрөмж, программ хангамж, загвараар бүтээсэн хагас дамжуулагчийг Вашингтоны тусгай
зөвшөөрөлгүйгээр “Huawei”
компанид нийлүүлэхийг хориглосон шинэ хориг арга хэмжээнүүд өнөөдрөөс хэрэгжиж
эхэлж байгаа юм.
АНУ-ын шийдвэрийн дагуу дэлхийд чип үйлдвэрлэлээрээ тэргүүлэгч “Samsung Electronics” болон “SK hynix” зэрэг компаниас “Huawei” компани руу хагас дамжуулагч нийлүүлэхийг зогсоох ажээ. “Huawei” нь “Samsung”-ийн томоохон таван хэрэглэгчийн нэг бол “SK hynix” компанийн борлуулалтын 10 гаруй хувийг тус компани эзэлдэг байна.
Салбарын эх сурвалжуудын мэдээлж буйгаар, “Huawei”-д тавьсан хориг БНСУ-аас БНХАУ руу гаргах хагас дамжуулагчийн экспортод нөлөөлөх төлөвтэй байгаа ажээ. "Энэ оны эхний долоон сарын байдлаар БНСУ-ын чипийн экспортын 41 орчим хувийг БНХАУ эзэлсэн" гэж Солонгосын Олон улсын худалдааны холбооноос мэдээлжээ.
“АНУ-ын хориг нэг
жилийн турш үргэлжилбэл БНСУ-ын чип үйлдвэрлэгчид экспортын алдагдлаас 10 их
наяд вон буюу 8.45 тэрбум ам.долларын хохирол амсаж магадгүй” гэж салбарын шинжээчид
тооцоолжээ. Энэ нь БНСУ-ын 2019 оны чипийн нийт экспортын /93.93 тэрбум ам.доллар/ 10 орчим хувьтай тэнцэх ажээ.
