“Samsung”-ийн эвхэгддэг гар утасны урьдчилсан захиалга 800 мянга давжээ

ДЭЛХИЙН МЭДЭЭ | ЭДИЙН ЗАСАГ
khulan@montsame.gov.mn
2021-08-24 16:56:20

СӨҮЛ. /Yonhap/. БНСУ-ын “Samsung Electronics” компанийн шинэ загварын эвхэгддэг ухаалаг гар утаснуудын дотоодын зах зээл дэх урьдчилсан захиалга 800 мянга давлаа гэж салбарын эх сурвалжууд өнөөдөр мэдээлжээ.


Тодруулбал, “Galaxy Z” эвхэгддэг гар утасны гурав дахь үеийн загварууд болох “Galaxy Z Fold3” гар утаснаас 600 мянга, “Galaxy Z Flip3”-аас 200 мянган ширхэгийг даваа гарагт дууссан нэг долоо хоногийн урьдчилсан захиалгын хугацаанд захиалаад байна гэж эх сурвалжууд мэдээлсэн байна. Энэ нь “Galaxy Z Fold2” гар утасныхаас 10 дахин их гэсэн үг юм.


Samsung” компани “Galaxy Z” загварын хамгийн сүүлийн үеийн гар утаснуудаа наймдугаар сарын 11-нд танилцуулахдаа үнийг нь өмнөх загваруудаас ойролцоогоор 400 мянган воноор /340 ам.доллар/ хямд байлгахаа мэдэгдсэн юм. Энэ нь ийм гар утасны хэрэглээг дэлгэрүүлэх зорилттой нь холбоотой ажээ.


Z Fold3” нь ухаалаг үзэг дэмждэг “Samsung”-ийн анхны эвхэгддэг утас бөгөөд дотоодын зах зээлд 1.99 сая воноор худалдаалагдана. Харин “Z Flip3” гар утасны хувьд 1.25 сая воны үнэтэй байна. “SK Telecom” компанийн мэдээлснээр, захиалагчдыг насны ангиллаар нь авч үзэхэд 60 хувь нь 30-40-өөд насныхан байжээ.


Харин загвараар нь авч үзвэл, 30-40-өөд насны эрэгтэйчүүд “Z Fold3” гар утасны урьдчилсан захиалгын 57 хувийг эзэлсэн бол “Z Flip3” гар утсыг 25-45 насны эмэгтэйчүүд хамгийн их буюу 35 хувийг нь захиалсан байна.  

Related news