Ulaanbaatar
Монгол Улс элэг шилжүүлэн суулгах мэс заслын амжилтаа олон улсад тайлагнаж байна
МОНГОЛЫН МЭДЭЭ | ЭРҮҮЛ МЭНД
Улаанбаатар /МОНЦАМЭ/. Олон улсын амьд донороос элэг шилжүүлэн суулгах нийгэмлэг, УНТЭ, ХСҮТ хамтран “iLDLT colloquium 2023 in Ulaanbaatar” эрдэм шинжилгээ, онол практикийн олон улсын хурал зохион байгуулж байна.
Хуралд АНУ, Япон, БНСУ, БНХАУ, Тайвань, БНЭУ, Бельги зэрэг элэг шилжүүлэн суулгах мэс заслаар дэлхийд тэргүүлэгчид оролцож байна. Монголын эрүүл мэндийн салбарт бөөр, элэг, ясны үүдэл эс шилжүүлэн суулгах өндөр технологиудыг бүрэн нутагшуулсан бол нойр булчирхай, зүрх шилжүүлэн суулгах багууд бүрэлдэж, бэлтгэл ажлаа хангаж байгаа аж.
Монгол Улс элэг шилжүүлэн суулгах мэс
заслыг нутагшуулсан 45 дахь орон болж олон улсад бүртгэгдсэн. Энэ төрлийн мэс
засал, эмчилгээг өмнө нь манай иргэд гадаадыг зорьж, өндөр төлбөртэй хийлгэдэг байсан бол 2011 оноос хойш
эх орондоо, 2021 оноос Монгол Улсын Засгийн газар, Эрүүл мэндийн яамнаас цогц
бодлого хэрэгжүүлж, эрхтэн шилжүүлэн суулгах эмчилгээг ЭМД-аас гаргаж, 100 хувь
үнэ төлбөргүй хийлгэж байна.
Элэг шилжүүлэн суулгах үндэсний баг 200 дахь мэс заслаа амжилттай хийгээд байна. УИХ-аар донорын тухай хуулийг баталж, амьгүй донорын асуудлыг шийдэх, Эрхтэн шилжүүлэн суулгах төвийн барилгын ажлыг шийдэхээр ажиллаж буй юм.
