Ulaanbaatar
ЗАВХАН: Сурагч Б.Сайннямбуу оны онцлох хүүхдээр шалгарчээ
ОРОН НУТГИЙН МЭДЭЭ | ЗАВХАН
Улиастай, 2024 оны арванхоёрдугаар
сарын 24 /МОНЦАМЭ/. Завхан аймгийн Эрдэнэхайрхан сумын 9а ангийн сурагч Б.Сайннямбуу Монгол Улсын оны онцлох хүүхдийн нэгээр
шалгарчээ.
Хүүхдийн төлөө үндэсний зөвлөл, Гэр бүл, хөдөлмөр, нийгмийн хамгааллын яам, Засгийн газрын хэрэгжүүлэгч агентлаг Хүүхэд, гэр бүлийн хөгжил, хамгааллын ерөнхий газраас хүүхдийн хөгжих, нийгмийн амьдралд оролцох, тэдний гаргасан амжилт, ололтыг алдаршуулах, нийгэмдээ үлгэр дуурайлал болгох зорилгоор “Оны онцлох хүүхэд”-ийг шалгаруулах ёслолыг 32 дахь жилдээ уламжлал болгон зохион байгуулж байна.
2024 онд үндэсний болон олон улс, тив дэлхийн түвшинд оюун ухаан, сурлага, урлаг, уран бүтээл, биеийн тамир, спорт, байгаль хамгаалал, монгол ёс, түүх, соёлыг өвлөн уламжлагч, хүмүүнлэг энэрэнгүй, сайн үйлстэн, хүүхдийн оролцооны байгууллагын манлайлагч хүүхэд, техник сэтгэлгээ, шинэ санаачилга, багийн амжилт гэсэн 10 төрөлд үндэсний хэмжээнд 1678 хүүхэд өрсөлджээ. Эдгээрээс онцгой амжилт гарган эх орноо сурталчлан үе тэнгийнхнээ манлайлсан 74 хүүхэд “2024 оны "Оны онцлох хүүхэд”-ээр шалгарлаа. Түүний нэг нь сурагч Б.Сайннямбуу юм.
Сурагч Б.Сайннямбуу нь 2024 онд "Биеийн тамир, спортын төрлөөр "Оны онцлох хүүхэд"-ээр шалгарсан байна. Тэрээр аймаг, улсын тэмцээнүүдэд тогтмол амжилттай оролцохоос гадна Монгол улсаас гадаадын олон оронд самбо, жүдо бөхийн төрлөөр амжилт үзүүлжээ.
Б.Сайннямбуу нь 2024 онд өсвөр үеийн улсын аварга шалгаруулах жүдо бөхийн тэмцээний тэргүүн байр, өсвөр үеийн улсын аварга шалгаруулах самбо бөхийн тэмцээний тэргүүн байр, аймгийн аварга шалгаруулах самбо бөхийн тэмцээний тэргүүн байрын шагналтай. Япон улсын Элчин сайдын нэрэмжит “Жүдоч сурагч-2024” улсын тэмцээний тавдугаар байр, Сэлэнгэ аймгийн Бор-Өндөр суманд болсон самбо бөхийн улсын тэмцээний тэргүүн байрын эзэн.
Казахстан Улсын Актау хотод болсон Ази тивийн аварга шалгаруулах тэмцээний гуравдугаар байр, Кипр улсад болсон самбо бөхийн дэлхийн аварга шалгаруулах тэмцээний гуравдугаар байр эзэлсэн гэхчлэн амжилтуудыг үзүүлжээ.
Завхан нутгийнхаа нэрийг улсад болон гадаадын олон улсад эх орноо төлөөлөн спортын өндөр амжилтыг үзүүлсэн суралцагч Б.Сайннямбуу болон түүний дасгалжуулагч багш Д.Баянмөнх нарт баяр хүргэж, спортын өндөр амжилтыг хүсье гэж Завхан аймгийн Хүүхэд, гэр бүлийн хөгжил хамгааллын газрын Хүүхдийн хөгжил оролцоо хариуцсан мэргэжилтэн Д.Цэвэлмаа мэдээлэв.
