Ulaanbaatar
Улсын драмын эрдмийн театр ажлын байранд суурилсан жүжигчин бэлтгэнэ
МОНГОЛЫН МЭДЭЭ | СОЁЛ УРЛАГ
Улаанбаатар, 2025 оны гуравдугаар сарын 27 /МОНЦАМЭ/. Улсын драмын эрдмийн театр болон Соёл урлагийн их сургууль хамтын ажиллагааны санамж бичиг, гэрээнд гарын үсэг зурж “Г.Доржсамбуугийн нэрэмжит жүжиглэх урлаг” хөтөлбөрийг хамтран хэрэгжүүлэхээр болжээ.
УДЭТ-ын СУИС-тай хамтран хэрэгжүүлэх бакалаврын “Жүжиглэх урлаг” хөтөлбөр нь зургаадугаар сард элсэлтээ зохион байгуулж, есдүгээр сарын 1-нээс хэрэгжүүлж эхлэх юм. Уг хөтөлбөр нь дөрвөн жилд нэг удаа элсэлт авах бөгөөд жүжигчний болон суурь хичээлүүдийг УДЭТ-ын найруулагчид, мэргэжлийн урлагийн байгууллагын нэр хүнд бүхий мастер багш нар зааж, ажлын байранд суурилсан сургалт зохион байгуулах ажээ.
Г.Доржсамбуу найруулагч 1980-1985 онд УБДС-ийн кино драмын жүжигчний багш, 1985-1994 онд УДЭТ-ын ерөнхий найруулагч, захирлаар ажиллаж, Монголын театрын урлагт шинэчлэл хийсэн найруулагч хэмээн үнэлэгддэг эрхэм билээ. 1990-1992 онд найруулагчийн санаачлагаар анхны Театр студи ангийн жүжигчдийг бэлтгэх сургалтыг эхлүүлж байсан түүхтэй.
