Ulaanbaatar
“Huawei” компанийн орлого 20 гаруй хувиар өсжээ
ДЭЛХИЙН МЭДЭЭ | ЭДИЙН ЗАСАГ
БЭЭЖИН, 2025 оны дөрөвдүгээр сарын 1 /CNBC/. Хятадын “Huawei” технологийн компанийн харилцаа холбоо, хэрэглээний салбарын бизнесүүд хурдацтай тэлснээр орлого нь огцом өсжээ.
Тодруулбал, 2024
онд 862.1 тэрбум юань буюу 118.2 тэрбум ам.долларын орлого олсон нь өнгөрсөн оны мөн үеийнхээс 22.4 хувиар өссөн байна. Энэ нь 2020 онд 891.4 тэрбум юанийн орлого олж байсантай харьцуулахад үл ялиг доогуур үзүүлэлт бөгөөд компанийн түүхэнд хоёрдугаарт бичигдэх хамгийн өндөр үзүүлэлт болжээ.
Харин цэвэр ашиг 62.6 тэрбум юань болж, 2023 оныхтой харьцуулахад 28 хувиар буурсан байна. Үүнд
хөрөнгө оруулалт нэмэгдсэн нь
ихээхэн нөлөөлсөн гэж “Huawei” мэдэгджээ.
Хятадын технологийн компани хагас дамжуулагч гэх мэт гол технологиудын нийлүүлэлтийг хязгаарласан Америкийн хоригуудыг даван
туулахыг эрмэлзэж буй үед дээрх тайланг танилцуулсан байна.
“2024 онд “Huawei” компанийн бүхэл бүтэн баг хамт олон гадаад сорилтуудыг даван туулахын зэрэгцээ бүтээгдэхүүнийхээ чанар, үйл ажиллагааны үр ашгийг улам сайжруулахын тулд гар нийлэн ажиллалаа” гэж “Huawei” компанийн санхүү хариуцсан захирал Мэн Ваньжоу компанийн жилийн тайланд дурджээ.
Тус компани судалгаа хөгжүүлэлтийн ажилд 179.7 тэрбум юань зарцуулсан нь орлогын 20.8 хувьтай тэнцэж байна. Энэ нь 2023 онд 164.7 тэрбумыг зарцуулж байсантай харьцуулахад өсжээ. Тус компани хиймэл оюун ухаанд зориулсан дата төв, үүлэн тооцоолол, авто машины технологи зэрэг салбарт бизнесээ төрөлжүүлж байна.
