Ulaanbaatar
Олон орны хоолны соёлыг таниулах “UB food” фестивал төв талбайд болно
МОНГОЛЫН МЭДЭЭ | НИЙГЭМ
Улаанбаатар, 2025 оны дөрөвдүгээр сарын 2 /МОНЦАМЭ/. Аялал жуулчлалын улирлыг эхлүүлж, дөрөвдүгээр сарын хоёр дахь долоо хоногт үндэсний болон олон орны хоолны соёлыг иргэд, жуулчдад таниулах “UB food” фестивалыг нийслэлийн Засаг даргын Тамгын газраас санаачлан зохион байгуулахаар болжээ.
Тус фестивал энэ сарын 8-14-ны хооронд Сүхбаатарын талбайд болно. Энэ удаагийн фестивалаар Узбекистаны хоолны амт, соёлыг онцлохын зэрэгцээ Монголын бурхан шашинтны төв Гандантэгчинлэн хийдийн лам нар нэг тонн хэмжээтэй ширмэн тогоонд гурилтай шөлийг уламжлалт аргаар бэлтгэж, монгол хоолны соёлыг түгээх аж. Өдөрлөгт хүрэлцэн ирсэн иргэд олон үндэстний амтат хоолыг мастер тогоочдын бэлтгэснээр төрөлх амт, жорынх нь дагуу амтлах боломжтой.
Тухайлбал, Узбекистан үндэстний алдарт плов, шашлык, казань кебаб, самса тэргүүтнийг узбек мастер тогооч өөрийн жорын дагуу бэлтгэж, иргэд, жуулчдад танилцуулах аж. Мөн залуучуудад зориулсан Dj үзүүлбэр, Open Mic, “Бага тойрог” урлагийн тоглолт, узбек бараа бүтээгдэхүүний худалдаа, Улаанбаатар театрын тоглолт, “Анир” поп оркестрын тоглолт, амьд хөгжмийн тоглолт, төрөл бүрийн хоолны тэмцээнийг төлөвлөсөн байна.
“UB food” фестивалиар Узбекистан, Монгол
хоолыг онцлох ч бусад олон орны хоолны соёл, амт чанар, стандартыг хоол
үйлчилгээний салбарт нэвтрүүлж, иргэдэд танилцуулах, жуулчдын анхаарлыг татах
олон сонирхолтой үзүүлбэр бэлтгэжээ.
Цаашид “UB food” олон орны хоолны
фестивалийг тусгай чиглэлийн аялал жуулчлалыг хөгжүүлэхэд чухал ач холбогдолтой
байхаар тогтмол зохион байгуулах юм.
