Ulaanbaatar
Э.Даваажамц, Б.Буянхишиг нар 5000 км гүйхээр Баян-Өлгийгөөс гараагаа эхлүүллээ
МОНГОЛЫН МЭДЭЭ | НИЙГЭМ
Улаанбаатар, 2025 оны дөрөвдүгээр сарын 3 /МОНЦАМЭ/. Зэвсэгт хүчний 123 дугаар ангийн хөгжимчин, цэрэгжлийн спортын мастер, ахлах ахлагч Э.Даваажамц, Зэвсэгт хүчний 234 дүгээр ангийн гүүрчин аврагч, спортын мастер, дэд ахлагч Б.Буянхишиг нар эх орныхоо дөрвөн зүгийн хязгаарт орших Соёмбот баганыг Монгол Улсынхаа төв цэгтэй холбосон 5000 км замыг туулахаар гараанаас гарлаа.
Хэт холын марафон гүйгч нар Алтай таван Богдын Cонгинотын даваанаас өчигдөр гүйлтээ эхлүүлсэн байна. Гүйгчдийг гараанаас гарах мөчид Өлгийн цэргийн хүрээний анги, салбаруудын офицер, ахлагч, цэргийн гэрээт алба хаагч, хугацаат цэргийн алба хаагчдын төлөөлөл эхний 15 км хүртэлх зайд хамтдаа гүйж, урт холын замд нь урам зориг хайрлажээ.
Тэд Алтай Таванбогдоос зүүн захын цэг Дорнод аймагт байрлах Соёлз уулын Модот хамар хүртэл 11 аймгийн 40 сумын нутаг дэвсгэрээр 3280 км замыг 63 хоногт, хойд захын цэг Хөвсгөл аймагт байрлах Монгол шарын даваанаас өмнөд захын цэг Өмнөговь аймгийн Орвог гашууны Бор толгой хүртэл таван аймгийн 23 сумын нутаг дэвсгэрээр 1720 км замыг 36 хоногт тус тус туулж дуусгахаар төлөвлөжээ.
Улмаар долоодугаар сард буюу Үндэсний их баяр наадмын өмнө барианд орох аж. Ингэхдээ өдөрт дунджаар 50-55 км замыг туулах юм байна.
