Ulaanbaatar
ДУНДГОВЬ: “Ойлгоё, хайрлая” өдөрлөг зохион байгуулав
ОРОН НУТГИЙН МЭДЭЭ | ДУНДГОВЬ
Мандалговь, 2025 оны 4 дүгээр сарын 3 /МОНЦАМЭ/. “Аутизмыг таниулах дэлхийн өдөр”-ийг тохиолдуулан Дундговь
аймгийн Хөгжлийн бэрхшээлтэй хүний төвөөс “Ойлгоё, хайрлая” өдөрлөг зохион
байгуулав.
Тус аймгийн хэмжээнд тусгай хэрэгцээт 1321 иргэн, 218
хүүхэд байгаа гэсэн судалгаа буй. Аутизм нь хүний бусадтай харилцах, нийгмийн
харилцаанд орох, мэдээллийг хүлээж авч ойлгох чадварт нөлөөлдөг эмгэг хэмээн мэргэжлийн
байгууллагаас тодорхойлжээ.
Аутизмтай хүүхдүүд бусдаас арай өөрөөр ертөнцийг харж,
хүлээж авдаг ба тэдний хувьд бусадтай харилцах, үйл явдалд хариу үйлдэл үзүүлэх
хэлбэр ондоо байна. Хэдийгээр энэ нь нийгмийн харилцаанд ороход тодорхой
хүндрэлүүдийг учруулах эрсдэлтэй ч аутизмын талаарх ойлголттой болсноор тэдэнд
туслах боломжтой.
Тиймээс аутизмтай хүмүүс болон тэдний гэр бүл, асран
хамгаалагчдыг ойлгож, дэмжих, хүлээн зөвшөөрөх, боловсрол, хөдөлмөр эрхлэлт,
эрүүл мэндийн тусламж үйлчилгээг жигд хүртэх боломжийг сайжруулахыг уриалах нь
энэхүү өдөрлөгийн зорилго юм.
Энэ үеэр Монгол Улсын зөвлөх, тусгай олимпын
дасгалжуулагч Б.Сүнжидмаа багшаар удирдуулсан “Бяцхан тамирчид” үзүүлбэр үзүүлж,
Хөгжлийн төвөөс үйлчилгээ авдаг тусгай хэрэгцээт хүүхдүүдийн зурсан зураг,
наамлын бүтээлээр үзэсгэлэн гаргаж, иргэдэд танилцуулжээ.
Эцэг эхчүүд энэхүү эмгэгийг эрт үед нь илрүүлж, мэргэжлийн хүмүүст хандсанаар хүүхдийг бие даан амьдрах чадвартай болгох бүрэн боломжтой.
