Ulaanbaatar
Уул уурхайн тусгай зөвшөөрөл олголт, хууль тогтоомжийн хэрэгжилтэд аудит эхлүүллээ
МОНГОЛЫН МЭДЭЭ | НИЙГЭМ
Улаанбаатар, 2025 оны дөрөвдүгээр сарын 4 /МОНЦАМЭ/. Үндэсний аудитын газар “Уул уурхайн тусгай зөвшөөрөл олголт, хууль тогтоомжийн хэрэгжилт” сэдэвт гүйцэтгэлийн аудитын нээлтийг өнөөдөр хийлээ.
Уул уурхайн салбарын хууль, тогтоомжийн хүрээнд олгогдож байгаа тусгай зөвшөөрлийн хэрэгжилт хэрхэн хангагдаж байгаа эсэх, тус салбарын хууль тогтоомжид давхардал, хийдэл, зөрчил байгаа эсэхийг судлан, дүгнэлт зөвлөмж боловсруулах нь энэ удаагийн аудитын зорилго ажээ.
Монгол Улсын Ерөнхий аудиторын орлогч Я.Самбууням аудитыг нээхдээ төлөвлөгөө болон явцад анхаарах шаардлагатай зарим асуудлаар зөвлөмж өгсөн байна. Тэрбээр “Энэ удаагийн аудитыг Аж үйлдвэр, эрдэс баялгийн яам, Ашигт малтмал , газрын тосны газар, Үндэсний геологийн алба, Эрдэс баялгийн мэргэжлийн зөвлөл, Цөмийн энергийн комисс болон уул уурхайн салбарын бусад холбогдох байгууллагыг хамруулан гүйцэтгэн” хэмээн онцоллоо.
Ингэхдээ дээрх байгууллагаас 2019-2025 онд гаргасан шийдвэр, үйл ажиллагааны талаарх баримт материал, мэдээлэлд аудит хийхийг тодотгожээ. Энэхүү аудитын тайланг ирэх долоодугаар сард УИХ-ын Төсвийн байнгын хороо болон Төрийн захиргааны төв байгууллагад хүргүүлэхээр төлөвлөсөн байна.
