Ulaanbaatar
Йемений Ерөнхий сайд Израилын цохилтод өртөн амь үрэгджээ
ДЭЛХИЙН МЭДЭЭ | УЛС ТӨР
КАИР, 2025 оны наймдугаар сарын
29 /РИА Новости/. Шийт шашинтнуудын “Ансар Алла” хөдөлгөөнийхний /хуситууд/
байгуулсан Йемений засгийн газрын тэргүүн Ахмед Галеб ар-Рахави нийслэл Сана
хотод Израилын сөнөөгч онгоцууд цохилт өгөх үеэр амь үрэгджээ. Энэ тухай
ар-Рахавигийн гэр бүлийнхэнд ойр байдаг Йемен дэх эх сурвалж мэдээлсэн байна.
Израилын онгоцууд Сана хотын өмнөд хэсгийн Хадда дүүргийг бөмбөгдөх үеэр 4 хүн, тэдний дотор ерөнхий сайд Ахмед Галеб ар-Рахави амиа алдсан гэж эх сурвалж ярьсан байна. Ар-Рахави өнгөрсөн оны наймдугаар сард Ерөнхий сайдаар томилогдсон бөгөөд “Ансар Алла” бүлэглэл түүнийг нас барсан талаар удахгүй мэдээлэх ажээ.
Пүрэв гарагт Израилын тал тус бүлэглэлийн хуарангууд ба бусад байрлал руу 12 удаа агаараас цохилт өгсөн
байна. Тус бүлэглэл дуунаас хэт хурдан “Палестин-2” гэдэг пуужингаар
Тель-Авивийн Бен-Гурионы нэрэмжит нисэх онгоцны буудалд цохилт өгнө гэж мэдэгдсэнээс
хойш 24 цагийн дараа Израилын онгоцууд Сана хотыг бөмбөгдсөн байна. Израилын
талын үзэж байгаагаар, цохилтод өртөн Батлан хамгаалахын сайд, “Ансар Алла”-гийн
Жанжин штабын дарга нар амь үрэгдсэн байх магадлал өндөр байгаа ажээ.
Долоодугаар сарын сүүлчээр “Ансар Алла” бүлэглэл Газын зурваст Израилын явуулж буй байлдааны ажиллагааны хариуд тус улс руу хийж буй довтолгооноо эрчимжүүлж, “далайгаар бүслэн хаах” 4 дэх шатны үйл ажиллагаагааг эхлүүлж байгаагаа мэдэгдсэн байна. Мөн хуситуудын удирдагч Абдель Малик аль-Хусигийн мэдэгдсэнээр, "Анвар Алла" хөдөлгөөнийхөн 2023 оны 11 дүгээр сараас хойш Израилын нутаг болон АНУ, Их Британы хөлөг онгоцууд руу 1679 пуужин, нисгэгчгүй онгоцоор довтолсон байна.
Хуситууд 2014 оны есдүгээр сараас
хойш Йемений төвийн болон хойд нутгийн ихэнх мужууд болон нийслэл Сана хотыг
хяналтдаа байлгасаар байгаа бөгөөд 2015 оны гуравдугаар сард Саудын Араб тэргүүтэй холбоотнууд хуситуудын эсрэг байлдааны ажиллагаа явуулж эхэлсэн
боловч үр дүнд хүрээгүй байна.
