Ulaanbaatar
“Милан-Кортина 2026” өвлийн олимп, паралимпын медалийн загварыг танилцуулав
МОНГОЛЫН МЭДЭЭ | СПОРТ
Улаанбаатар, 2025 оны наймдугаар сарын 29 /МОНЦАМЭ/. Өвлийн XXV олимпын наадам Италийн Милан, Кортина хотод 2026 оны хоёрдугаар сарын 6-22-нд болно.
Тус олимп болон паралимпын наадмын медалийн загварыг зохион байгуулагчид албан ёсоор танилцууллаа. Энэхүү медалийн нэг тал нь тамирчны ялалт, нөгөө тал нь ялалтын ард байдаг баг хамт олныг илэрхийлсэн хос утгатай. Энэ удаагийн өвлийн олимпод 245 алт, 245 мөнгө, 245 хүрэл медалийн эзэн тодрох бол паралимпад 137 алт, 137 мөнгө, 137 хүрэл медаль эзнээ хүлээж байна. Медалийн голд олимп, паралимпын бэлгэ тэмдэг болон “Милан-Кортина 2026” наадмын логог байрлуулжээ. Диаметр нь 80 мм, зузаан нь 10 мм юм.
Уг медалийг 1928 онд үүдээ нээсэн Европын хэвлэл болон зоос үйлдвэрлэлээр тэргүүлэгч “Istituto Poligrafico e Zecca dello Stato” компани урлан бүтээжээ. Тус компани нь Италийн Эдийн засаг, сангийн яамны бүрэн өмчийн байгууллага бөгөөд бүх медалийг сэргээгдэх эрчим хүч ашиглаж, байгальд ээлтэй, хоргүй, дахин боловсруулах боломжтой хамгаалалтын бүрхүүлтэйгээр урласан байна.
“Милан-Кортина 2026” медалиуд нь зөвхөн шагнал биш, Италийн зүрхний цохилт, хөдөлгөөнт загварын үндсэн илэрхийлэл болон мөрөөдөл биеллээ олж буй тусгал болохыг бүтээгчид онцоллоо. Динамик, орчин үеийн шийдэлтэй энэхүү медалийн загварыг Италийн авангард урлагаас сэдэвлэж бүтээсэн бөгөөд дэлхийн шилдэг тамирчдын урам зориг, хүсэл тэмүүлэл, түүнчлэн олимп, паралимпын үзэл санааг илэрхийлснийг “Милан-Кортино 2026” багийн “Brand, Identity and Look of the Games”-ийн захирал Раффаэлла Панье тайлбарласан байна.
