Ulaanbaatar
ӨМНӨГОВЬ: Боловсролын салбарт 70 гаруй тэрбум төгрөгийн хөрөнгө оруулалт хийж байна
ОРОН НУТГИЙН МЭДЭЭ | ӨМНӨГОВЬ
Даланзадгад, 2025 оны наймдугаар сарын 30 /МОНЦАМЭ/. Өмнөговь аймаг энэ онд боловсролын салбартаа 70 гаруй тэрбум төгрөгийн хөрөнгө оруулалт хийгээд байна. Тодруулбал, орон нутгийн төсвөөр хоёр сургууль, гурван цэцэрлэг, нэг дотуур байрны барилга, өргөтгөлийн дөрвөн барилга, найман сургууль, цэцэрлэг, дотуур байранд их засвар хийжээ. Түүнчлэн “Өсөлттэй Өмнөговь” хөтөлбөрийн хүрээнд боловсролын салбарын чанар хүртээмжийг тасралтгүйгээр өсөн нэмэгдүүлэх, багшийн чадвар, суралцагчдын сурлагын чанарыг дээшлүүлэх зорилгоор 5 чиглэлийн 29 зорилттой бодлого боловсруулан хэрэгжүүлж байна.
Хичээлийн шинэ жилийн зорилго, зорилтоо тодорхойлохоор боловсролын салбарын багш, ажилтнуудын сургалт зөвлөгөөн хоёр өдрийн турш үргэлжиллээ. Энэ сарын 28-нд сургууль, цэцэрлэгүүдийн тогооч, үйлчлэгч, жолооч нарыг хамруулсан бол 29-ний өдөр боловсролын салбарын удирдах албан тушаалтнууд, багш нар зэрэг 700 гаруй хүн хамруулан бага хурал зохион байгуулав.
Багш нарын бага хуралд Өмнөговь аймгийн Засаг даргын орлогч Ж.Занабазар оролцож, сургууль, цэцэрлэгийн хүртээмжийг нэмэгдүүлэх, анги бүлэг дүүргэлтийг багасгах замаар багшийн ачааллыг бууруулах, багшийн мэргэжлийн тасралтгүй хөгжил, гадаад дотоодод туршлага судлах боломж нөхцөл, урамшуулал, дэмжлэгээр нийгмийн баталгааг хангах бодлогыг барьж ажиллахыг зорьж буйгаа онцолсон.
Энэ хичээлийн жилд 23 сургууль, 34 цэцэрлэг, Политехникийн коллеж, Технологийн дээд сургууль, Насан туршийн суралцахуйн төв, хувийн бага сургууль зэрэг 61 сургалтын байгууллагад 25300 суралцагч боловсролын үйлчилгээ үзүүлнэ.
Өмнөговь аймгийн Засаг даргын орлогч Ж.Занабазар:
-Ирэх жилийн хөгжлийн бодлого төлөвлөлтийг хийж байгаа энэ үед Боловсролын салбарын хурал зөвлөгөөнийг Өмнөговь аймаг анх удаа зохион байгуулсан нь цаг хугацааны хувьд ч тун оновчтой байлаа. Учир нь хурлаас гаргасан санал санаачилгыг төсөв төлөвлөгөөнд тусган хэрэгжүүлэхэд дөхөм болж байна.
Өмнөговь аймаг "Нутгийн дэм" хөтөлбөрийг дөрөв дэх жилдээ хэрэгжүүлж байгаа. Энэ хүрээнд найман мянга гаруй төрийн албан хаагчид сар бүр 400-600 мянган төгрөг буюу жилд 40 орчим тэрбум төгрөгийн дэмжлэг үзүүлж байна. Тэдний 2500 гаруй нь боловсролын салбарынхан.
Мөн боловсролын салбарын чанар хүртээмжийг сайжруулах, сургууль, цэцэрлэг нэмж байгуулах, багш нарыг тогтвортой ажлын байраар хангах зэрэг олон талт ажлыг эрчимжүүлэн хэрэгжүүлэхээр төлөвлөн ажиллаж байна.
