Ачаалж байна…
Ачаалж байна…
Цогзолмаа Г

Улаанбаатар, 2026 оны арваннэгдүгээр сарын 19 /МОНЦАМЭ/. Боловсролын сайд Л.Энх-Амгалан Кембрижийн их сургуулийн Хэвлэл, үнэлгээний газрын Олон улсын боловсролын хэлтсийн Зүүн Азийн бүсийн захирал, доктор Жин Жао, тус хэлтсийн олон улсын сүлжээний төлөвлөлт, үйл ажиллагаа хариуцсан захирал Том Кендон нарыг хүлээн авч уулзлаа.
Боловсролын яамны мэдээлснээр, уулзалтаар Монгол Улсад Кембрижийн олон улсын хөтөлбөр хэрэгжүүлэх төрийн өмчийн сургуулиудыг орон нутагт үе шаттай байгуулах, тэдгээрийн үйл ажиллагааг эхлүүлэх бэлтгэл хангах, багш, сургуулийн удирдлагын чадавхыг бэхжүүлэх, сургалт, үнэлгээний чиглэлээр хамтран ажиллах асуудлыг хэлэлцэв.
Боловсролын яам олон улсын хөтөлбөрөөр суралцах боломжийг нэмэгдүүлэх зорилгоор улсын зургаан бүс, нийслэлийн зургаан дүүрэгт олон улсын хөтөлбөртэй нийт 12 ахлах сургууль байгуулах Засгийн газрын төлөвлөгөөний хүрээнд Кембрижийн хөтөлбөрийг хэрэгжүүлэхээр ажиллаж байна.
Энэ үеэр доктор Жин Жао Монголын төрийн өмчийн сургуулийн сурагчид Кембрижийн олон улсын шалгалтад өндөр амжилт үзүүлж байгааг онцоллоо. Тухайлбал, энэ жил Монголын сурагчид нийт 63 шагналын 33-ыг хүртэхээр шалгарсан нь төрийн өмчийн сургуулиудад олон улсын хөтөлбөр хэрэгжүүлж, сурагчдад дэлхийн түвшинд мэдлэг, чадвараа сорих, үнэлүүлэх боломж олгосны үр дүн юм.
Кембрижийн олон улсын хөтөлбөрийг орон нутагт үе шаттай нэвтрүүлснээр сурагчдын чанартай боловсрол эзэмших боломжийг нэмэгдүүлэхийн зэрэгцээ багш, сургуулийн удирдлагын мэргэжлийн ур чадварыг олон улсын жишигт нийцүүлэн хөгжүүлэх ач холбогдолтой юм.
Кембрижийн шилдэг суралцагчдын шагнал гардуулах ёслол өнөөдөр болох аж.