Ачаалж байна…
Ачаалж байна…
Буянаа Ламжав

СӨҮЛ, 2026 оны арваннэгдүгээр сарын 20 /Yonhap/. БНСУ-д хиймэл оюун ухаан ашиглан шалгалтын үеэр хуулсан хэрэг гарсантай холбогдуулан хяналт шалгалтыг чангатгасны дараа пүрэв гарагт болсон их, дээд сургуулийн элсэлтийн шалгалтын үеэр 98 шалгуулагч зөрчил гаргасныг илрүүлсэн тухай тус улсын Боловсролын яам мэдээлжээ.
Тус яамны мэдээлснээр, энэ жилийн их, дээд сургуульд элсэгчдийн чадварыг үнэлэх шалгалтын (CSAT) үеэр хуулахаас урьдчилан сэргийлэх арга хэмжээг чангатгаж, улс даяарх гар утсанд онцгой байдлын сэрэмжлүүлэг илгээсэн байна. Нийт 98 зөрчлийн 49-ийг уг сэрэмжлүүлгийг илгээсний дараа илрүүлжээ. Шалгалтын явцад гар утасны дууг хаасан байсан ч чанга дохио дуугаргадаг сэрэмжлүүлгийг гурван удаа илгээсэн байна. Ингэснээр шалгалт эхлэхээс өмнө гар утсаа хүлээлгэн өгөөгүй, биедээ нуун авч орсон шалгуулагчдыг илрүүлжээ.
Илэрсэн зөрчлүүдийн 44 нь цахим төхөөрөмжтэй холбоотой байсан бөгөөд үүний тав нь шалгалтын үеэр ухаалаг төхөөрөмж ашигласан тохиолдол байв.
Тухайлбал, ухаалаг нүдний шил ашигласан нэг, биедээ жижиг камер болон утасгүй чихэвч авч орсон нэг, шалгалтын материалыг гар утсаараа гэрэл зургийн хальсанд буулгасан нэг тохиолдол тус тус бүртгэгджээ. Шалгалтын танхимд цахим төхөөрөмж ашиглахыг бүрэн хориглож, шалгуулагчдад зөвхөн харандаа авч орохыг зөвшөөрсөн байна.
Мөн нүдний шилэнд далд камер суурилуулсан эсэхийг шалгаж, хувцасны товчинд жижиг камер нуусан байж болзошгүй тул товчнуудыг тусгай наалтаар бүрхжээ.
Түүнчлэн шалгалтын үеэр хууль бус арга хэрэглэсэн этгээдийн 10 жилийн хугацаанд дахин шалгалт өгөх эрхийг хасаж, зөрчлийн талаар мэдээлсэн иргэнд 100 сая вон буюу ойролцоогоор 75 мянган ам.долларын урамшуулал олгоно гэж засгийн газар мэдэгдсэн байна.