Ачаалж байна…
Ачаалж байна…
Мөнхзул Батбаяр

Баянхонгор, 2026 оны арваннэгдүгээр сарын 20 /МОНЦАМЭ/. Баянхонгор аймагт залуучуудын хөгжил, нийгмийн оролцоог нэмэгдүүлэх, тэдний дуу хоолой, шинэлэг санаа, судалгаанд суурилсан шийдлийг дэмжих зорилготой “Залуучууд судлал” эрдэм шинжилгээний бага хурлын хоёрдугаар шатны шалгаруулалтыг зохион байгууллаа.
Тус хурлыг аймгийн Залуучуудын хөгжлийн салбар зөвлөл, Улаанбаатар хот дахь Баянхонгор сумын нутгийн зөвлөл, Соёл, урлаг, аялал жуулчлал, залуучуудын газар, Хөдөлмөр, халамжийн үйлчилгээний газар, Баянхонгор аймаг дахь Монголын залуучуудын холбоо, Баянхонгор аймаг дахь Социал Демократ Монголын залуучуудын холбоо хамтран зохион байгуулсан байна.
Энэ удаагийн хуралд нийт 23 оролцогч үндсэн зургаан сэдвийн хүрээнд судалгааны бүтээлээ ирүүлснээс эхний шатанд шалгарсан таван оролцогч судалгааны ажлаа мэргэжлийн шүүгчдийн бүрэлдэхүүнд танилцуулж, үнэлүүлэв. Монгол Улсын Гавьяат багш, сурган хүмүүжүүлэх ухааны доктор Шархүүгийн Чимгээ, Политехникийн коллежийн нийгмийн ухааны багш, боловсрол судлалын магистр Болдын Мөнхтуяа, Хөдөлмөр, халамжийн үйлчилгээний газрын Хөдөлмөрийн хэлтсийн дарга Ганболдын Ганчулуун, аймгийн Залуучуудын хөгжлийн салбар зөвлөлийн нарийн бичгийн дарга Батнасангийн Долгорсүрэн нар шүүгчдийн бүрэлдэхүүнд ажиллажээ.
Оролцогчдын судалгааны бүтээлүүдэд залуучуудын шилжилт хөдөлгөөн, орон нутгийн хөгжил, хөдөлмөр эрхлэлт, боловсрол, ур чадвар болон малчин залуучуудад тулгамдаж буй асуудлуудыг хөндсөнөөрөө онцлог байсныг зохион байгуулагчид онцолсон. Шүүгчдийн нэгдсэн үнэлгээгээр оролцогч О.Мөнхцэцэгийн “Баянхонгор аймгийн залуучуудын боловсрол, ур чадвар ба хөдөлмөр эрхлэлтийн тулгамдсан асуудал, шийдвэрлэх боломж” сэдвээр илтгэл тэргүүн байранд шалгарсан байна.
Тус хурал нь Залуучуудын хөгжлийг дэмжих тухай хуулийн хүрээнд залуучуудын нийгмийн оролцоог нэмэгдүүлэх, тэдний санал санаачилга, судалгааны бүтээлийг дэмжих, орон нутгийн хөгжлийн бодлого, үйл ажиллагаанд залуучуудын оролцоог хангахад чиглэж байгаагаараа ач холбогдолтой юм.