Гурван ШТС-ын түгээгүүр алдаатай байсныг тогтоов
ОРОН НУТГИЙН МЭДЭЭ | ДОРНОДДорнод /МОНЦАМЭ/. Аймгийн ИТХ-ын даргын удирдамжийн дагуу байгуулагдсан ажлын хэсэг ШТС-уудад хяналт шалгалт хийв. Дорнод аймгийн төвд найман ААН-ийн 16 шатахуун түгээгүүрийн станц үйл ажиллагаа явуулдгаас, гурван ШТС-ын түгээгүүр алдаатай байсныг тогтоожээ.
Тухайлбал, Стандарт ойл, Сод Монгол групп, Петровисийн
ШТС-ын түгээгүүрийн шахалтын тоолуурын хэлбэлзэл нь +10-аас -42 гэсэн үзүүлэлттэй байсан аж. Угтаа түгээгүүрийн
алдаа +,-25 грамм байдаг, түүнчлэн энэ үзүүлэлт цаг агаарын
температураас шалтгаалан өөрчлөгдсөн ч -35 граммаас хэтэрдэггүй гэнэ. Энэ алдааг
газар дээр нь залруулж анхааруулга санамж өгсөн байна.
Түүнчлэн ажлын хэсгийн
бүрэлдэхүүн ШТС-уудын газрын тосны бүтээгдэхүүн хадгалж буй нөөцийн сав бүрээс
дээж авч, түгээгүүрийн шингэний тоолуурын битүүмжлэлийг ч шалгажээ. Харин бензин
шатахуун, түлшний өнгө тунгалаг, ус болон механик хольц илрээгүй гэж ажлын хэсгийн
шалгалтын тайланд дурдсан байна.