Улаанбаатар
УИХ-ын дарга Г.Занданшатар Бүх Хятадын Ардын Төлөөлөгчдийн Их Хурлын Байнгын хорооны дарга Ли Жаньшуг угтлаа
МОНГОЛЫН МЭДЭЭ | УЛС ТӨР
Улаанбаатар /МОНЦАМЭ/. Улсын Их Хурлын дарга Г.Занданшатар Монгол Улсад албан ёсоор айлчилж буй БНХАУ-ын Бүх Хятадын Ардын Төлөөлөгчдийн Их Хурлын Байнгын хорооны дарга Ли Жаньшуг Сүхбаатарын талбайд угтлаа.
Тэрбээр Монгол Улсад өчигдөр буюу энэ сарын 10-нд хүрэлцэн ирсэн бөгөөд өнөөдөр айлчлал албан ёсоор эхэлж буй юм.
Улсын Их Хурлын дарга Г.Занданшатар зочны хамт Их Эзэн Чингис хааны хөшөөнд хүндэтгэл илэрхийллээ. Мөн ноён Ли Жаньшу Төрийн ордны Ёслол хүндэтгэлийн өргөөний Баганат танхимд хүндэт зочны дэвтэрт сэтгэгдлээ үлдээн, гарын үсэг зурав. Дараа нь Улсын Их Хурлын дарга Г.Занданшатар, БНХАУ-ын Бүх Хятадын Ардын Төлөөлөгчдийн Их Хурлын Байнгын хорооны дарга Ли Жаньшу нарын албан ёсны хэлэлцээ Төрийн ордонд эхэллээ хэмээн Улсын Их Хурлын Хэвлэл мэдээлэл, олон нийттэй харилцах хэлтсээс мэдээлэв.Хэлэлцээний дараа ноён дарга Ли Жаньшу Монгол Улсын Ерөнхийлөгч У.Хүрэлсүхэд бараалхаж, Ерөнхий сайд Л.Оюун-Эрдэнэтэй уулзана.
Уулзалт, хэлэлцээний үеэр талууд Монгол, Хятадын хууль тогтоох дээд байгууллага хоорондын болон хоёр талын улс төр, эдийн засаг, хүмүүнлэгийн салбарын хамтын ажиллагааны өргөн хүрээтэй асуудлаар санал солилцоно. Энэ удаагийн айлчлал нь Монгол, Хятадын Иж бүрэн стратегийн түншлэлийн харилцааг бэхжүүлж, улс төрийн итгэлцэл, харилцан ойлголцлыг нэмэгдүүлж, хууль тогтоох байгууллага хоорондын хамтын ажиллагааг өргөжүүлэн, худалдаа, эдийн засгийн хамтын ажиллагааг идэвхжүүлэхэд чухал түлхэц үзүүлэх юм. Энэ нь Бүгд Найрамдах Хятад Ард Улсын Бүх Хятадын Ардын Төлөөлөгчдийн Их Хурлын Байнгын хорооны даргын түвшний 9 жилийн дараа манай улсад хийж буй айлчлал юм.
