Ulaanbaatar
Амьсгалын замын өвчин өнгөрсөн оныхоос 13 хувиар багасжээ
МОНГОЛЫН МЭДЭЭ | ЭРҮҮЛ МЭНД
Улаанбаатар /МОНЦАМЭ/. ЭМЯ-ны мэдээлснээр, шинэ коронавирусний халдвар дэлхийн 215 улс орон, нутаг дэвсгэрт бүртгэгдээд байна. Тус өвчнөөр дэлхийд 3.5 сая хүн өвчилж 1.1 сая хүн эдгэрч 248 мянган хүн нас барсан байна. Одоо 2.1 сая хүн эмчлүүлж байна.
Манай
улсын хувьд, өнөөдрийн байдлаар 1041 хүн ажиглалтад байна. Ажиглалтын 10 байранд
2 их эмч, 25 резидент эмч ажиллаж байгаа юм.
Франкфурт-Улаанбаатар
чиглэлийн тусгай нислэгийн онгоцоор өчигдөр ирсэн иргэдийг ХӨСҮТ, Цэргийн төв
эмнэлэг, Жаргалант, Хабу, Энхсаран, Кантавр зочид буудалд тус тус байрлуулжээ. Одоогоор
эдгээр хүмүүсийн эрүүл мэндийн байдал хэвийн байгаа аж.
ЗӨСҮТ-ийн баг уг онгоцоор ирсэн хүмүүсийн 350 ширхэг ачаа тээш, 700 кг карго, 12 тээврийн хэрэгслийг халдваргүйтгэжээ. Мөн өчигдөр 14 чиглэлийн галт тэргэнд Төмөр замын нэгдсэн эмнэлгийн 10 эмч ажиллаж, 340 ажилтан, 4800 гаруй хүнд эрүүл мэндийн тандалт судалгаа хийсэн байна.
Коронавирусний
халдварын талаарх зөвлөгөө мэдээлэл өгдөг 119 шуурхай утсанд өнгөрсөн 24 цагийн
дотор 201 дуудлага иржээ. Коронавирусээр халдварлаж 14 хоног гэртээ тусгаарлагдсан, биеийн байдал нь хөнгөн
байгаа нэг иргэн Швед улсаас утасдаж зөвлөгөө авчээ.
Нэгдүгээр
сараас хойш иргэд амны хаалт зүүж, гараа тогтмол угааснаар өнгөрсөн оны мөн
үеийнхээс амьсгалын замын өвчин 13 хувиар, томуу, томуу төст өвчин 3.1 хувиар буурсан
байна. Иймээс иргэд гараа сайтар савандаж угаах, амны хаалт зүүх, 1.5-2 метр
хүртэлх зайнд харилцах зэрэг дэглэмийг үргэлжлүүлэн чанд дагаж мөрдөхийг ЭМЯ-наас дахин санууллаа.
