Ulaanbaatar
Коронавирусээр халдварласан долоон тохиолдол нэмж бүртгэгдлээ
МОНГОЛЫН МЭДЭЭ | ЭРҮҮЛ МЭНД
Улаанбаатар /МОНЦАМЭ/. Манай улсад коронавирусний халдварын долоон тохиолдол шинээр бүртгэгдэж, долоон хүн эдгэрч дараагийн шатны тусгаарлалтад шилжжээ.
Энэ тухай ХӨСҮТ-ийн захирал Д.Нямхүү өнөөдрийн ЭМЯ-ны хэвлэлийн хурлын үеэр мэдээлэхдээ, улсын хэмжээнд өчигдөр 359 сорьцод шинжилгээ хийхэд Нур-Султан-Улаанбаатар чиглэлийн онгоцоор ирсэн дөрвөн хүний давтан шинжилгээ болон Сөүл-Улаанбаатарын онгоцоор ирсэн хоёр хүн, Алтанбулагийн боомтоор орж ирсэн нэг жолоочид халдвар илэрлээ. Халдвартай иргэд нь 6-63 насны, зургаан эрэгтэй, нэг эмэгтэй хүн юм байна.
Өнөөдөр долоон хүн эдгэрч ХӨСҮТ-ээс дараагийн шатны сувилалд шилжиж байна. Тэдгээр иргэд нь 17-49 хоног эмчлүүлжээ.
Ингэснээр манай улсад коронавируст халдварын батлагдсан тохиолдол 213 бүртгэгдсэнээс 153 хүн эдгэрчээ. Одоо ХӨСҮТ-д 60 хүн эмчлүүлж байгаа бөгөөд 53 хүний биеийн байдал хөнгөн, 7 хүнийх хүндэвтэр байна.
Сөүл-Улаанбаатарын чиглэлийн онгоцоор ирсэн 265 хүн, ажиглах
байранд тусгаарлагдсан 38 хүний давтан шинжилгээ, Нийслэлийн дүүргийн Өрхийн
эрүүл мэндийн төвөөс цуглуулсан
4 сорьц, ХӨСҮТ-д тусгаарлагдсан 17 хүний давтан шинжилгээ, Дархан-уул аймагт
тусгаарлагдсан гурав, Сэлэнгэ аймагт тусгаарлагдсан гурав, Алтанбулаг боомтоор
орж ирсэн 22 жолоочийн шинжилгээ халдваргүй
гарчээ.
