Ulaanbaatar
Коронавирусээр халдварласан нийт 200 хүнийг эмчлээд байна
МОНГОЛЫН МЭДЭЭ | ЭРҮҮЛ МЭНД
Улаанбаатар /МОНЦАМЭ/. Коронавирусээр халдварласан гурван хүн эдгэрч, дараагийн шатны ажиглалтад шилжиж байгааг ХӨСҮТ-ийн захирал Д.Нямхүү ЭМЯ-ны өнөөдрийн ээлжит хэвлэлийн хурлын үеэр мэдээллээ.
Эдгэрсэн иргэд нь 64 настай эмэгтэй, 27 настай эрэгтэй, 21 настай эмэгтэй бөгөөд 15-16 хоногийн дараа эмнэлгээс гарч байна. Ийнхүү манай улсад 227 тохиолдол бүртгэгдэж, 200 иргэн эдгэрлээ. ХӨСҮТ-д хэвтэн эмчлүүлж буй өвчтөнүүдээс 24-ийнх нь биеийн байдал хөнгөн, 3 хүн хүндэвтэр байна.
Улсын хэмжээнд дөрвөн лабораторид
өчигдөр 681 сорьцод шинжилгээ хийхэд
коронавирус илрээгүй байна. Тодруулбал,
ХӨСҮТ-д тусгаарлан ажиглаж байсан 13 хүн, ажиглах байранд тусгаарлагдсан 262
иргэн, давтан шинжилгээнд хамрагдсан 18 хүн, идэвхтэй тандалтын зорилгоор
нийслэлийн 5 иргэн, Орхон, Дархан-Уул, Сэлэнгэ аймаг болон Бага Баян амралтын
газар тусгаарласан 270 иргэн, Алтанбулаг боомтоор нэвтэрсэн ачаа тээврийн 14
жолооч, Замын Үүд боомтоор орж ирсэн 99 иргэн халдваргүй гарчээ.
Мөн Истанбул-Улаанбаатарын чиглэлийн тусгай онгоцод мэндэлсэн ихэр охид болон эхийн биеийн байдал хэвийн байгааг мэдээллээ.
