Ulaanbaatar
Эрүүгийн 267 хэрэгт яллах дүгнэлт үйлдэн, шүүхэд шилжүүлэв
МОНГОЛЫН МЭДЭЭ | ХУУЛЬ
Улаанбаатар /МОНЦАМЭ/. Прокурорын байгууллага энэ сарын 17-21-нд хэрэг бүртгэлтийн 31.115, мөрдөн байцаалтын 2719 хэргийг хянажээ.
Үүнээс Эрүүл
мэндийн халдашгүй байдлын эсрэг 111, Өмчлөх эрхийн эсрэг 60, Хөдөлгөөний
аюулгүй байдал, тээврийн хэрэгслийн ашиглалтын журмын эсрэг 14, Бэлгийн эрх
чөлөө, халдашгүй байдлын эсрэг 8, Хүний амьд явах эрхийн эсрэг 8, Хүрээлэн буй орчны эсрэг 6, Авлига, албан
тушаалын эсрэг 2, Мансууруулах эм, сэтгэцэд нөлөөт бодисыг хууль бусаар ашиглах
3, Заналхийлэх 1, нийт 267 хэрэгт яллах дүгнэлт үйлдэн шүүхэд шилжүүлсэн байна.
Тодруулбал,
-Нийслэлийн прокурорын газраас Цэргийн төв эмнэлгийн
Гэмтлийн эмнэл зүйн төвийн гэмтлийн яаралтай тусламжийн тасгийн дарга М нь эрх
мэдэл, албан тушаалын байдлаа урвуулан ашиглаж, тус эмнэлгийн сувилагч М, И
нарыг цэргийн ахлагч бүрэлдэхүүнд оруулж, цэргийн цол олгоно гэх санал тавьж
хахууль авсан, сувилагч И нь хахууль өгсөн гэх хэрэгт Эрүүгийн хуулийн 22.4
дүгээр зүйлийн 4, 22.5 дугаар зүйлийн 1-т зааснаар яллах дүгнэлт үйлдэн, БЗД дэх эрүүгийн хэргийн анхан шатны
шүүхэд;
-Сэлэнгэ аймгийн прокурорын газраас иргэн Х нь тус аймгийн
Ерөө сумын нутаг дэвсгэрт тусгай зөвшөөрөлгүйгээр ашигт малтмалын эрэл хайгуул,
олборлолт хийж, байгаль
экологид хохирол учруулсан гэх хэрэгт Эрүүгийн хуулийн 24.2 дугаар зүйлийн 1-т
зааснаар яллах дүгнэлт үйлдэн, тус аймаг дахь сум дундын эрүүгийн хэргийн анхан
шатны шүүхэд;
-Дархан-Уул аймгийн прокурорын газраас “Дулаан шарын гол” ТӨХК-ийн гүйцэтгэх захирал Б, дэд захирал Э нар эрх мэдэл, албан тушаалын байдлаа урвуулан ашиглаж, бусдад давуу байдал бий болгосон гэх хэрэгт Эрүүгийн хуулийн 22.1 дүгээр зүйлийн 1-т зааснаар яллах дүгнэлт үйлдэн, тус аймаг дахь сум дундын эрүүгийн хэргийн анхан шатны шүүхэд тус тус шилжүүлснийг Ерөнхий прокурорын газраас мэдээлэв.
