Ulaanbaatar
“Ханжоу 2022” Азийн XIX наадамд оролцох шатарчдад амжилт хүсэв
МОНГОЛЫН МЭДЭЭ | УЛС ТӨР
Улаанбаатар /МОНЦАМЭ/. УИХ-ын дарга Г.Занданшатар “Ханжоу 2022” Азийн XIX наадамд Монгол Улсаа төлөөлөн оролцох шатрын спортын Үндэсний шигшээ багийн дасгалжуулагч, тамирчдыг хүлээн авч уулзаж, амжилт хүслээ.
БНХАУ-ын Ханжоу хотноо энэ сарын 23-наас 10 дугаар сарын 8-ны өдрүүдэд болох тус наадамд хамгийн олон буюу 45 орны 10 мянга орчим тамирчин оролцож байгаагаараа онцлог юм.
Шатрын үндэсний шигшээ багт эрэгтэй 5, эмэгтэй 5 тамирчин багтаж байгаа бөгөөд дасгалжуулагчаар С.Ган-Од, М.Гүнбаяр ажиллаж, шигшээ багийг Монголын шатрын холбооны Тэргүүн дэд ерөнхийлөгч Б.Наранбаатар ахалж байна.
Азийн наадмын шатрын тэмцээн ганцаарчилсан төрлөөр энэ сарын
22-ны өдөр эхэлж, тоглолт
талдаа 25 минут, нүүдэл бүрд 10 секундийн нэмэгдэлтэй рапид (түргэвчилсэн)
төрлөөр үргэлжилнэ. Ганцаарчилсан
төрөлд Б.Мөнгөнтуул, Т.Мөнхзул, С.Ган-Эрдэнэ, С.Билгүүн нар эх орноо төлөөлөн
тивийн шилдгүүдтэй өрсөлдөнө. Багийн төрлийн тэмцээн 9 дүгээр сарын 28-ны өдөр
эхлэх юм.
“Ханжоу 2022” Азийн XIX наадамд Монголын баг 35 спортын
төрөлд 400 гаруй тамирчин, 120 гаруй дасгалжуулагч, албаны нийт 520 гаруй хүний
бүрэлдэхүүнтэй оролцохыг УИХ-ын Хэвлэл
мэдээлэл, олон нийттэй харилцах газраас мэдээлэв.
