Ulaanbaatar
АН: Цар тахлын үеийн санхүүгийн зарцуулалтын талаарх сонсголд шинжээч томилуулахыг шаардана
МОНГОЛЫН МЭДЭЭ | УЛС ТӨР
Улаанбаатар, 2023 оны аравдугаар сарын 23 /МОНЦАМЭ/. УИХ дахь АН-ын бүлэг өнөөдөр Төрийн ордонд ээлжит хуралдаанаа хийв.
Тус бүлгийн дарга О.Цогтгэрэл сэтгүүлчдэд мэдээлэл хийх үеэрээ коронавируст халдварын цар тахлын онцгой байдлын үед Засгийн газраас авч хэрэгжүүлсэн төлөвлөгөө, төсөл хөтөлбөрүүдийн санхүүгийн зарцуулалт, гадаадын орнуудаас авсан зээл тусламж, иргэн, аж ахуйн нэгжүүдийн хандив, тусламж болон тэдгээрийн орлого, зарлагыг нийтэд ил болгох тухай асуудлаарх Ерөнхий хяналтын сонсголыг өнөө өглөө зохион байгуулах байсан ч шинжээч томилоогүй тул уг сонсголыг явуулах боломжгүй гэж үзэж байна. Учир нь тус сонсголыг явуулахад шинжээчийг оролцуулаагүй тохиолдолд нөхцөл байдлыг бодитоор үнэлж, үр дүнтэй зохион байгуулан иргэд олон нийтийг үнэн мэдээллээр хангах бололцоогүй гэлээ.
Тэрбээр мөн үеэр хэлэхдээ "Хөгжлийн банкны 1 их наяд төгрөгийн асуудал дээр шинжээч томилогдон ажиллахдаа жил тойрсон ажил болсон. Одоо 20 их наяд төгрөгийн асуудал яригдаж байна. Тиймээс энэ асуудлыг улстөржүүлэлгүй, холбогдох байнгын хороо шинжээч томилох нь зүй юм" гэлээ. Тус бүлгийнхний зүгээс уг сонсголд шинжээч томилогдох хүртэл шаардаж ажиллана гэв.
