Ulaanbaatar
Г.Болор-Эрдэнэ, У.Сүрэнжав нарын паралимпийн эрх баталгаажлаа
МОНГОЛЫН МЭДЭЭ | СПОРТ
Улаанбаатар, 2024 оны нэгдүгээр сарын 15 /МОНЦАМЭ/. Олон улсын таеквондогийн холбооноос “Парис-2024” зуны паралимпын наадамд оролцох эрхээ авсан тамирчдыг өчигдөр албан ёсоор зарлажээ.
Манай улсаас эрэгтэйчүүдийн 63 кг-ын жинд дэлхийн болон Азийн таван удаагийн аварга, Азийн наадмын аварга гавьяат тамирчин Г.Болор-Эрдэнэ, эмэгтэйчүүдийн 52 кг-д дэлхийн аваргын хүрэл, Азийн наадмын мөнгөн медальт У.Сүрэнжав нар багтлаа.
Г.Болор-Эрдэнийн хувьд паралимпийн дэвжээнд хоёр дахь удаагаа өрсөлдөнө. Энэ удаа тэрбээр медалийн тавцанд зогсохын төлөө тулалдана. Тэгвэл У.Сүрэнжав анх удаа зуны паралимпэд оролцох бөгөөд тэр нь “Парис-2024” болж байна.
Тэд “Парис-2024” зуны паралимпийн наадамд оролцох эрхээ авсан Монголын
таеквондогийн анхны тамирчид болж байгаа юм.
