АРХАНГАЙ: Улсын онцгой комиссоос 39 сая төгрөгийн дэмжлэг үзүүлэх батламж гардуулав

ОРОН НУТГИЙН МЭДЭЭ | АРХАНГАЙ
gereltod@montsame.mn
2023-02-06 09:02:19
Архангай /МОНЦАМЭ/. Хүнс, хөдөө аж ахуй, хөнгөн үйлдвэрийн сайд Х.Болорчулуун, УИХ-ын гишүүн Г.Тэмүүлэн, Мал эмнэлгийн ерөнхий газрын Мал амьтны эрүүл мэндийг хамгаалах газрын дарга Д.Тунгалаг болон Улсын онцгой комиссын гишүүдээс бүрдсэн ажлын баг Архангай аймагт ажиллалаа.

Ажлын багтай аймгийн ИТХ-ын дарга Б.Батжаргал, аймгийн Засаг даргын орлогч В.Мөнхбат нар Булган, Төвшрүүлэх, Цэнхэр сумын өвөлжилтийн нөхцөл байдалтай танилцаж, сумдын онцгой комиссын гишүүдийн санал, сэтгэгдлийг сонслоо.

ХХААХҮ-ийн сайд Х.Болорчулуун Цэнхэр, Төвшрүүлэх суманд тус бүр 20 тн малын тэжээлийг хүргүүлэхээр шийдвэрлэжээ. Мөн ХХААХҮЯ, НҮБ-ын хамтран хэрэгжүүлж буй "Зудын эрсдэлийг эртнээс бууруулах хамтарсан тусламж" арга хэмжээний хүрээнд Хашаат, Хангай, Өгийнуур, Цахир сумын 40 өрхөд бэлэн мөнгө, малын тэжээл бүхий 22 сая төгрөг, эрсдэл их 17 сум тус бүрд нэг сая төгрөг нийт 39 сая төгрөгийн дэмжлэг үзүүлэх батламжийг аймгийн Засаг даргын орлогч В.Мөнхбатад гардууллаа.
Ажлын багийн бүрэлдэхүүн аймгийн онцгой комиссын өргөтгөсөн хуралдаанд оролцож, 2022-2023 оны өвөлжилт, хаваржилт, бог малын мялзан өвчний нөхцөл байдлын талаар мэдээлэл солилцож, асуулт хариулт өрнүүлэв.
Тус аймгийн Цэцэрлэг, Эрдэнэмандал, Жаргалант суманд бог малын мялзан өвчин гарч, хорио цээрийн дэглэмтэй байна. Одоогоор дээрх сумдад 90 албан хаагч хорио цээрийн дэглэм мөрдүүлэн, арга хэмжээ авч ажиллаж байгаа ажээ.

Бог малын мялзан өвчнөөр өвчилсөн 1373 малыг устгаж, 2706 малыг тусгаарлаад байна. Өвөлжилт хүндэрч, малын тамир муудаж байгаа энэ үед массын вакцин хийх нэн шаардлагатай байгааг аймгийн онцгой комиссоос илэрхийллээ.

ХХААХҮЯ болон МЭГ-аас бог малын мялзан өвчнөөс урьдчилан сэргийлэх вакцины татан авалтыг ирэх долоо хоногт хийж аймгуудад хуваарилна гэв.
Related news