Ulaanbaatar
Нийт нутгийн 60 орчим хувьд цасан бүрхүүл тогтжээ
МОНГОЛЫН МЭДЭЭ | БАЙГАЛЬ ОРЧИН
Улаанбаатар, 2023 оны арваннэгдүгээр сарын 8 /МОНЦАМЭ/. Монгол орны нийт нутгийн 60 орчим хувьд цасан бүрхүүл тогтсон бөгөөд өвөлжилт хүндрэх төлөвтэй байгаа тул УОК-ын Нарийн бичгийн дарга, хурандаа Т.Баярхүү 21 аймгийн Засаг дарга, Онцгой байдлын газрын дарга болон Хүнс, хөдөө аж ахуйн газрын дарга нартай цаг үеийн асуудлаар цахим хурал хийлээ.
Хурлаар аймгуудын өвөлжилтийн бэлэн байдал, өвс тэжээлийн нөөц, авч хэрэгжүүлж байгаа арга хэмжээний талаарх мэдээллийг сонсож, холбогдох үүрэг чиглэлийг өгсөн юм.
Тухайлбал, аймгийн гамшгаас хамгаалах төлөвлөгөөг цаг үеийн нөхцөл байдалтай уялдуулан тодотгож, сум, багийн Засаг дарга нарыг мэргэжил, аргазүйгээр хангах, үүргийн хэрэгжилтэд хяналт тавьж ажиллахад онцгойлон анхаарах, цаг агаарын аюулт үзэгдлээс урьдчилан сэргийлэх сэрэмжлүүлэг мэдээг бүх шугамаар түгээх, хүн хүч, техник, хэрэгслийн бэлэн байдлыг хангах, өвөлжилтийн бэлтгэл ажлын хүрээнд авч хэрэгжүүлж байгаа арга хэмжээ, сэрэмжлүүлэг мэдээллийг иргэд, олон нийтэд тогтмол мэдээлж ажиллахыг үүрэг болголоо гэж ОБЕГ мэдээлэв.
Comments