Ulaanbaatar
ДУНДГОВЬ: “Мөнгөн жавар” мөсний баярыг анх удаа зохион байгуулав
ОРОН НУТГИЙН МЭДЭЭ | ДУНДГОВЬ
Мандалговь, 2025 оны нэгдүгээр сарын 20 /МОНЦАМЭ/. Дундговь аймгийн Гурвансайхан сумын ЗДТГ, Их газрын
чулууны БЦГХЗ-тай хамтран “Мөнгөн жавар” мөсний баярыг анх удаа зохион байгуулав.
Сумаараа цэвэр агаарт гарч, чөлөөт цагаа зөв өнгөрүүлэх, аж ахуйн нэгж байгууллагуудын оролцоо, идэвхийг нэмэгдүүлэх, хамт олны харилцаа, байгууллагуудын хамтын ажиллагааг сайжруулах, улмаар өвлийн спортыг сурталчлах, хөгжүүлэх зорилгоор тус үйл ажиллагааг ийнхүү зохион байгуулсан байна.
Энэ үеэр мөсөн дээрх олс таталт, мөсний шагай харваа, буухиа тэмцээн, тэшүүрийн тэмцээн, монгол хувцсаа хэрхэн зөв өмсөх вэ уралдаан зохион байгуулж, аваргуудаа шалгаруулсан байна. Тэмцээнд 8 байгууллага аж ахуйн нэгжийн 142 иргэн оролцож, сумын иргэд үзэж сонирхжээ.
Багийн нийлбэр дүнгээр Ерөнхий боловсролын сургууль түрүүлж, аж ахуйн нэгж байгууллагууд, Их газрын чулууны БЦГХЗ-ны баг хамт олон удаах байруудад шалгарчээ.
