Ulaanbaatar
ДУНДГОВЬ: Зөрчлийн тухай хуулийн зохицуулалтын талаар иргэдийн мэдлэг хомс байна
ОРОН НУТГИЙН МЭДЭЭ | ДУНДГОВЬ
Мандалговь, 2025 оны дөрөвдүгээр сарын1 /МОНЦАМЭ/. Дундговь аймгийн Прокурорын газрын мэдээлснээр тус
аймгийн хэмжээнд иргэн, хуулийн этгээдэд оногдуулсан торгуулийг хугацаандаа
төлдөггүй, Зөрчлийн тухай хуулийн зохицуулалтын талаар мэдлэг хомс байна.
Тодруулбал, тус байгууллагаас 2024 оны 1 дүгээр сарын нэгнээс
мөрдөж эхэлсэн Зөрчлийн тухай хуулийн ерөнхий
ангийн 3.5 дугаар зүйлд заасан “Торгох
шийтгэлийн хэмжээг хөнгөрүүлэх, нэмэгдүүлэх” үндэслэлийн хэрэгжилтийн байдлыг
судалж, хэрэгжилтэд дүгнэлт хийжээ.
Судалгаагаар иргэн, хуулийн этгээд дээрх хуулийн зохицуулалтын талаар мэдлэггүй, мэдээлэл хомс, өөрийнх нь хайхрамжгүй байдлаас шалтгаалж оногдуулсан торгуулийг хугацаанд нь төлдөггүй учраас хуульд заасан хөнгөрүүлэх нөхцөлийг эдэлж чадаагүй байна.
Зөрчлийн тухай хуулиар иргэн эрх бүхий албан тушаалтнаас
оногдуулсан торгох шийтгэлийг хуульд заасан хугацаа буюу 15 хоногийн дотор
төлсөн тохиолдолд 50 хувиар хөнгөрүүлэн, хугацаа хэтрүүлсэн тохиолдолд 50
хувиар нэмэгдүүлэн төлдөг.
Хэрэв нэмэгдүүлсэн торгуулийг төлөөгүй тохиолдолд эрх
бүхий албан тушаалтан нийтэд тустай ажил хийлгэх шийтгэлээр солих саналыг
шүүхэд гаргаж шийдвэрлүүлэх ба шүүгчийн оногдуулсан торгох шийтгэлийг хуульд
заасан хугацаанд биелүүлээгүй бол баривчлах шийтгэлээр солихоор хуульчилсан
байна.
Тиймээс иргэн эрх бүхий албан тушаалтан, эсхүл шүүхээс
торгох шийтгэл оногдуулсан тохиолдолд торгуулиа хуульд заасан хугацаанд нь төлөх
шаардлагатай ба хуулийн дээрх зохицуулалт нь тус хуулийн 3.5 дугаар зүйлийн 3
дахь хэсэгт заасан зөрчил үйлдсэн хүн, хуулийн этгээдэд хамаарахгүй болохыг Прокурорын
газраас анхаарууллаа.
Ташрамд, 2024 оны жилийн эцсийн байдлаар Дундговь
аймгийн хэмжээнд 22699 зөрчил шалгаж, зөрчил гаргасан 22184 иргэнийг 1058.2 сая
төгрөгөөр торгожээ. Шалгасан зөрчлийн тоо өмнөх оны мөн үеийнхтэй харьцуулахад 2.7
хувиар өссөн байна.
