Улаанбаатар
Ромын пап БНАСАУ-д айлчлах хүсэлтэй байгаагаа илэрхийлжээ
ДЭЛХИЙН МЭДЭЭ | УЛС ТӨР
СӨҮЛ. /Yonhap/.
Ромын пап Франциск БНАСАУ-д айлчлах хүсэлтэй байгаагаа илэрхийлсэн талаар БНСУ-ын
Ерөнхийлөгч Мүн Жэ Ин өнөөдөр мэдээлжээ.
Мүн Жэ Ин, Ромын
пап нар Италийн Ром хотноо болсон “Хорийн бүлэг”-ийн дээд хэмжээний уулзалтын
хүрээнд баасан гарагт Ватикан хотод уулзсан юм. Хөх ордны мэдээлснээр, уулзалтын үеэр Мүн Жэ Ин Ромын пап БНАСАУ-д
айлчилбал Солонгосын хойгт энх тайвныг цогцлооход түлхэц болно хэмээн хэлэхэд
пап нааштай хариу өгсөн байна.
“Ромын пап Солонгосын
хойгт энх тайвныг цогцлоохын төлөө залбирч, БНАСАУ-д айлчлах хүсэлтэй байгаагаа
илэрхийлсэн. Миний бие энх тайвныг цогцлоох үйл явц дахин эрчимжинэ гэдэгт найдаж
байна” гэж Мүн Жэ Ин Ромоос хөдлөхийнхөө өмнө “Facebook” хуудсандаа нийтэлжээ.
Мүн Жэ Ин, Ромын
пап нар 2018 онд БНСУ-ын Ерөнхийлөгчийг Италид төрийн айлчлал хийснээс хойш анх
удаа уулзаж буй нь энэ юм. Тухайн үед Ерөнхийлөгч Ромын папыг эх орондоо
айлчлахыг хүссэн БНАСАУ-ын удирдагч Ким Жөн Уны үгийг түүнд дамжуулсан боловч
БНАСАУ, АНУ-ын цөмийн хэлэлцээ зогсонги байдалд орсны улмаас айлчлал биеллээ олоогүй юм.
Мүн Жэ Ин мөн “Facebook” хуудсандаа, АНУ-ын Ерөнхийлөгч Жо
Байден, Францын Ерөнхийлөгч Эмманюэль Макрон, Германы Канцлер Ангела Меркель
тэргүүтэй удирдагчид хойгт энх тайвныг цогцлоохын төлөө үргэлжлүүлэн дэмжлэг
үзүүлэхээ илэрхийлсэн талаар нийтэлсэн байна.
Мөн “Хорийн бүлэг”-ийн
дээд хэмжээний уулзалтаар 2022 оны дунд үе гэхэд дэлхийн хүн амын 70 хувийг “COVID-19”-ийн вакцинд хамруулж, дэлхийн нийлүүлэлтийн
сүлжээнд үүсээд буй саатал тасалдлыг зохицуулахын төлөө хамтран ажиллахаар
тохиролцсоныг цохон тэмдэглэжээ.
