“Аль-Хиляль” клуб дээд амжилт тогтоожээ
ДЭЛХИЙН МЭДЭЭ | СПОРТЖИДДА, 2024 оны
гуравдугаар сарын 13 /BBC/. Саудын
Арабын “Аль-Хиляль” клуб хамгийн олон удаа дараалан хожсон дээд дивизионы
баг болж дэлхийн дээд амжилт тогтоожээ.
Мягмар гарагт
Азийн Аваргуудын лигийн тоглолтод “Аль-Иттихад” багийг 2:0 харьцаагаар буулган
авснаар “Аль-Хиляль” 28 дахь дараалсан хожлоо авчээ. Ингэснээр
Уэльсийн “Нью-Сейнтс” багийн 2016 онд тогтоосон амжилтыг /27/ эвдсэн байна.
“Фулхэм”-ийн
довтлогч асан Александр Митрович тэргүүтэй хөлбөмбөгчдийг эгнээндээ нэгтгэсэн “Аль-Хиляль”
клуб өнгөрсөн есдүгээр сарын 21-нд “Дамак”-тай хийсэн тоглолтыг 1:1 харьцаатай
тэнцээгээр өндөрлүүлснээс хойших бүх тоглолтдоо өрсөлдөгчөө хожсон байна.
“Аль-Хиляль”-ийн
төлөө мөн “Вулвз” клубийн хагас хамгаалагч асан Рубен Невиш, бразил
довтлогч Неймар нар хүчин зүтгэж байгаа бөгөөд Неймарын хувьд өнгөрсөн зун “Пари
Сен-Жермен”-ээс 90 сая орчим еврогийн гэрээгээр тус багт ирсэн юм. Гэхдээ Неймар
өвдөгний бэртлийн улмаас 10 дугаар сараас хойш талбайд гараагүй.
“Бенфика”, “Фламенго”
клубүүдийг дасгалжуулж байсан Жоржи Жежушаар удирдуулсан “Аль-Хиляль” Саудын
Арабын мэргэжлийн лигт Криштиану Роналдугийн “Аль-Наср”-ыг 12 оноогоор илүүрхэн
тэргүүлж байна.
“Аль-Хиляль” 28
дараалан хожихдоо эсрэг багийнхаа хаалганд оруулсан 81 гоолын 26-г нь А.Митрович хийсэн байна.
Тус баг лигийн 16 тоглолт, дотоодын цомын төлөөх гурван тоглолт,
Азийн аваргуудын лигийн есөн тоглолтод хожжээ.
Мягмар гарагт эсрэг багаа буулган авснаар “Аль-Хиляль” Азийн Аваргуудын лигийн хагас шигшээд шалгарсан байна.