ГОВЬ-АЛТАЙ: Иргэний андгай өргөх ёслол болов

ОРОН НУТГИЙН МЭДЭЭ | ГОВЬ-АЛТАЙ
185@montsame.mn
2022-11-26 14:14:49

Говь-Алтай  /МОНЦАМЭ/. Монгол Улсын "Иргэний андгай өргөх" ёслолын ажиллагаа боллоо.

Анхдугаар үндсэн хуулиа баталж, Бүгд Найрамдах Монгол Ард Улсыг тунхагласаны 98 жилийн ой 2022 оны 11 дүгээр сарын 26-ны өдөр тохиож,  Монгол Улсын Ерөнхий сайдын ивээл дор 20 дахь жилдээ зохион байгуулж буй “Иргэний андгай өргөх ёслол”-ын үйл ажиллагааг аймгийн Засаг даргын Тамгын газар, Гэр бүл, хүүхэд, залуучуудын хөгжлийн газар, Улсын бүртгэлийн хэлтэс, Монголын залуучуудын холбооны Говь-Алтай аймаг дахь салбар хамтран зохион байгууллаа.


Энэхүү үйл ажиллагаа нь өсвөр үе, залуучуудыг түүх соёлоо дээдэлсэн, эх оронч үзэлтэй, үүрэг хариуцлагаа ухамсарласан иргэн болгон төлөвшүүлэх зорилгоор 16 нас хүрч Монгол Улсын иргэний үнэмлэх авч буй сурагчдыг алдаршуулан, “Иргэний андгай” өргүүлэн, иргэний үнэмлэхийг батламжийн хамт гардуулдаг уламжлалтай.

Иргэний андгай өргөх ёслолд 16 настнуудын төлөөлөл болох 7 сургуулийн 150 гаруй сурагч бүртгүүлэн оролцож “ИРГЭНИЙ АНДГАЙ” өргөн “ИРГЭНИЙ ҮНЭМЛЭХ” болон “БАТЛАМЖ”-аа гардан авсан тухай тус аймгийн Гэх бүл, хүүхэд, залуус хөгжлийн газраас мэдээлэв.

Мөн эх орон, тусгаар тогнолын үнэ цэнийг ойлгуулах, эерэг хандлага, сэтгэлгээнд уриалах урам зориг, итгэл, эрч хүч өгөх зорилгоор аймгийн ЗДТГ-ын Цэргийн штабын тоо бүртгэлийн офицер Г.Мөнхбаяр илтгэл тавьж, сурагч хөвгүүдийн төлөөлөлд Цэргийн үүрэгтний үнэмлэх, “Батламж” гардуулж баяр хүргэсэн юм.

Энэ өдөр Монгол Улсын иргэний үнэмлэхээ хүндэтгэлтэйгээр гардан авч, Бүрэн эрхт Монгол Улсын иргэн болсноо ёсолсон залуусдаа  баяр хүргэж, хамтран зохион байгуулсан байгууллагуудын удирдлага, хамт олонд талархал илэрхийллээ.

Related news