Ulaanbaatar
ДУНДГОВЬ: Аймгийн хүн амын 83 хувь нь E-Mongolia системээс 758,426 удаагийн үйлчилгээ авчээ
ОРОН НУТГИЙН МЭДЭЭ | ДУНДГОВЬ
Мандалговь, 2025 оны гуравдугаар сарын 17 /МОНЦАМЭ/. Цахим хөгжил, инновац, харилцаа холбооны яамнаас гаргасан судалгаагаар төрийн цахим үйлчилгээний нэгдсэн E-Mongolia системд Дундговь аймгийн насанд хүрсэн хүн амын 83 хувь нь бүртгэлтэй байгаа ба тус системээс 758,426 удаагийн үйлчилгээ авсан байна.
“Алсын
хараа-2050” Монгол Улсын урт хугацааны хөгжлийн бодлогын цахим технологид
тулгуурласан иргэн төвтэй төрийн үйлчилгээнд бүрэн шилжих зорилтын хүрээнд
цахим болон операторын горимоор төрийн үйлчилгээ үзүүлэх нэгдсэн портал систем
www.e-mongolia.mn-ийг хэрэглээнд нэвтрүүлсэн.
Өнөөдөр иргэд төрийн
цахим үйлчилгээний нэгдсэн E-Mongolia системээс 11 байгууллагын 64 үйлчилгээг
авч байна.
Сумаар нь авч
үзвэл, Сайнцагаан сумын иргэдийн 83 хувь нь уг системд бүртгүүлж, 311,351 иргэн
үйлчилгээ авсан нь хамгийн өндөр байгаа бол Цагаандэлгэр сумын иргэдийн 81 хувь
нь бүртгүүлж, 24,577 удаагийн үйлчилгээ авсан нь хамгийн бага үзүүлэлт байна.
Цахим хөгжил,
инновац, харилцаа холбооны яамнаас хамгийн олон хэрэглэгч бүртгэлтэй эхний 5
сумаар Адаацаг (91 хувь), Луус (89 хувь),
Говь-Угтаал (88 хувь), Баянжаргалан (85 хувь), Дэлгэрцогт болон Хулд (85 хувь) сумыг
нэрлэжээ.
Төрийн үйлчилгээг ийнхүү цахимжуулснаар төрийн байгууллагуудаас үзүүлэх үйлчилгээний чанар, хүртээмжийг нэмэгдүүлж, төрийн үйлчилгээг иргэд хялбар, түргэн шуурхай, чирэгдэлгүй авах давуу талтай.
