Ulaanbaatar
Элчин сайд Шэнь Миньжуань “Монгол-Хятадын харилцааны хэтийн төлөв” сэдвээр хүндэтгэлийн лекц уншив
МОНГОЛЫН МЭДЭЭ | БОЛОВСРОЛ
Улаанбаатар, 2025 оны гуравдугаар сарын 25 /МОНЦАМЭ/. ШУА-иас зохион байгуулж буй “Элчин сайдын индэр” хүндэтгэлийн лекцийн энэ удаагийн зочноор БНХАУ-аас Монгол Улсад суугаа Онц бөгөөд Бүрэн эрхт Элчин сайд Шэнь Миньжуань уригдан оролцлоо.
ШУА-ийн Тэргүүлэгчдийн газар, ШУА-ийн Олон улс судлалын хүрээлэнтэй хамтран энэ оноос зохион байгуулж буй хүндэтгэлийн лекцийг ШУА-ийн Ерөнхийлөгч, академич С.Дэмбэрэл нээж үг хэлэв. Тэрбээр хэлсэн үгэндээ, Монгол, Хятад хоёр улс шинжлэх ухаан, боловсролын салбарт харилцааны баялаг өв уламжлалтай. Энэхүү уламжлалт харилцаа улам бүр өргөжиж БНХАУ-ын их, дээд сургууль, шинжлэх ухааны байгууллагуудад манай улсын мянга мянган залуус суралцаж, боловсрол эзэмшиж, эрдмийн зэрэг, цол хамгаалсаар байна. Өнөөдөр Монгол Улсын боловсрол, шинжлэх ухааны салбарт БНХАУ бол хамтын ажиллагааны хамгийн том түнш, хамгийн том хөрөнгө оруулагч улс болсныг тэрбээр онцлон тэмдэглэлээ.
Энэ удаа БНХАУ-аас Монгол Улсад суугаа Онц бөгөөд Бүрэн эрхт Элчин сайд Шэнь Миньжуань “БНХАУ-ын өндөр чанартай хөгжлийн бодлого ба Монгол-Хятадын харилцааны хэтийн төлөв” сэдвээр хүндэтгэлийн лекц уншив. Тэрбээр илтгэлдээ БНХАУ-ын хөгжлийн бодлого, стратеги ба Монгол-Хятадын харилцаа болон хоёр улсын шинжлэх ухаан-технологи, соёл, боловсролын харилцаа, хамтын ажиллагааг өргөжүүлэн хөгжүүлэх боломжийн тухай дурдсан юм.
Манай улс 2024 оны байдлаар НҮБ-ын гишүүн 193 оронтой дипломат харилцаатай байна. Харин ШУА-иас гадны 50 гаруй оронтой хамтарч ажилладаг. Энэ онд хамтын ажиллагааны гэрээ дууссан зарим байгууллагатай гэрээгээ сунгах томоохон судалгааны ажилд хамтран ажиллах зэргээр шинжлэх ухааны болон улс эх орны хөгжилд хувь нэмэр оруулах ажлыг хийхээр төлөвлөжээ.
Өнөөдрийн байдлаар Улаанбаатарт гадаадын 26 орны ЭСЯ, орон нутагт гадаадын 2 консулын газар үйл ажиллагаагаа явуулж байна.
