Элчин сайд Э.Булган Итгэмжлэх жуух бичгээ өргөн барив
МОНГОЛЫН МЭДЭЭ | УЛС ТӨР
Улаанбаатар, 2025 оны дөрөвдүгээр сарын 1 /МОНЦАМЭ/. Монгол Улсаас Өмнөд Африкийн Бүгд Найрамдах Улсад хавсран суух Онц бөгөөд Бүрэн эрхт Элчин сайд Э.Булган гуравдугаар сарын 27-нд Преториа хотноо Өмнөд Африкийн Бүгд Найрамдах Улсын Ерөнхийлөгч Матамела Сирил Рамафосад Итгэмжлэх жуух бичгээ өргөн барив.
Элчин сайд Э.Булган Итгэмжлэх жуух бичгээ өргөн барьсны дараа Ерөнхийлөгч Матамела Сирил Рамафосатэй уулзаж, Монгол Улсын Ерөнхийлөгч У.Хүрэлсүхийн мэндчилгээг Ерөнхийлөгч М.С.Рамафосад уламжлан, Монгол, Өмнөд Африкийн харилцаа, хамтын ажиллагааг харилцан сонирхсон салбаруудад өргөжүүлэн хөгжүүлэх боломжийн талаар санал солилцов.
Ерөнхийлөгч М.С.Рамафоса Элчин сайд Э.Булганд ажлын өндөр амжилт хүсэж, хоёр улсын харилцаа, хамтын ажиллагааг хөгжүүлэхэд бүх талын дэмжлэг үзүүлэхээ илэрхийлэв гэж ГХЯ-наас мэдээллээ.