Ачаалж байна…
Ачаалж байна…
Цогзолмаа Г

Улаанбаатар, 2026 оны арваннэгдүгээр сарын 20 /МОНЦАМЭ/. Боловсролын сайд Л.Энх-Амгалан эх хэлний боловсрол, суралцагчдын унших чадварыг хөгжүүлэх асуудлаар боловсрол, шинжлэх ухаан, соёлын байгууллага болон холбогдох төрийн бус байгууллагын төлөөлөлтэй уулзаж, цаашид хэрэгжүүлэх бодлого, үйл ажиллагааны талаар санал солилцлоо.
Боловсролын Яамны мэдээлснээр, уулзалтад МУИС, ШУА-ийн Хэл зохиолын хүрээлэн, Хэлний бодлогын үндэсний зөвлөл, МУБИС, БСҮХ, Монголын зохиолчдын эвлэл, бусад байгууллагын төлөөлөл оролцсон юм. Энэ үеэр Монгол Улсын Ерөнхийлөгчийн ивээл дор зохион байгуулсан “Эх хэл-Нэг Монгол” уриатай Монгол хэлний багш нарын улсын анхдугаар зөвлөгөөнөөс гарсан санал, зөвлөмжийг бодлогын түвшинд хэрэгжүүлэх, эх хэл, бичиг үсгийн боловсролын хөгжлийн дараагийн зорилтыг тодорхойлох асуудлыг хэлэлцэв.
Оролцогчид эх хэлээрээ уншиж ойлгох, бодож эргэцүүлэх, үзэл бодлоо илэрхийлэх, бүтээлчээр бичиж найруулах чадвар нь хүүхдийн суралцахуйн суурь төдийгүй боловсролын чанарыг тодорхойлох чухал үзүүлэлт болохыг онцоллоо. Иймд сургуулийн өмнөх боловсролоос бүрэн дунд боловсрол хүртэлх суралцагчдын унших чадварыг нэгдсэн бодлого, арга зүй, үнэлгээний тогтолцоогоор дэмжих шаардлагатайг тэмдэглэв.
Мөн олон улсын сайн туршлага, монгол хэлний онцлогт тулгуурлан суралцагчдын нас, хөгжлийн түвшинд нийцсэн “Унших чадварын үндэсний хүрээ” боловсруулах, эх хэл, бичиг үсгийн боловсролыг хөгжүүлэх үндэсний бодлого, хөтөлбөр хэрэгжүүлэхээр санал солилцжээ. Түүнчлэн эх хэлний боловсролыг шинжлэх ухааны судалгаа, хэл шинжлэл, сургалтын хөтөлбөр, багшийн хөгжил, хүүхдийн унших соёлтой уялдуулан хөгжүүлэх, холбогдох байгууллагын хамтын ажиллагааг өргөжүүлэх чиглэлээр санал дэвшүүлсэн байна.
Уулзалтын үр дүнд хамтарсан ажлын хэсэг байгуулж, эх хэл, бичиг үсгийн боловсролын бодлого, унших чадварыг дэмжих үндэсний хөтөлбөр болон “Унших чадварын үндэсний хүрээ”-ний төслийг боловсруулах ажлыг эхлүүлэхээр тогтлоо.
Талууд Монгол хүүхэд бүр эх хэлээрээ уншиж ойлгодог, бодож эргэцүүлдэг, мэдлэг бүтээдэг, өөрийгөө чөлөөтэй илэрхийлдэг иргэн болон төлөвших нь уг бодлого, хөтөлбөрийн хүрэх гол үр дүн байх ёстойг онцлов.