Газрын тосны бүтээгдэхүүний импортод 1.5 тэрбум ам.доллар зарцуулдаг

МОНГОЛЫН МЭДЭЭ | ЭДИЙН ЗАСАГ
ariunbold@montsame.gov.mn
2016-02-04 12:12:37

Монголын эдийн засгийн хөгжлийн томоохон салбар болох газрын тосны бүтээгдэхүүний үйлдвэрлэлд тулгамдаж буй асуудлыг шийдвэрлэх гарц, шийдлийг тодорхойлох зорилгоор Монголын газрын тосон бүтээгдэхүүн үйлдвэрлэгчдийн холбоо (МГТБҮХ)-ноос “Газрын тос ба Монгол Улсын эдийн засаг” хурлыг өнөөдөр зохион байгуулав.

Монгол Улс газрын тосны бүтээгдэхүүний жилийн хэрэглээ 1.2 сая тонн. Уг хэрэгцээг 100 хувь импортоор хангадаг бөгөөд үүнд 1.5 тэрбум ам.доллар зарцуулдаг байна. Шатахуун, тос тослох материалаа 100 хувь гаднаас авдагтай холбогдуулан валютын ханш өсдөг. Үүнийг дагаад бараа, бүтээгдэхүүн, үйлчилгээний үнэ ч тодорхой хэмжээгээр өсдөг нь эдийн засгийн хүндрэлтэй үед иргэдийн амьдралд сөргөөр нөлөөлж буйг албаны хүмүүс онцлон тэмдэглэж байв.

Энэ бүх асуудлыг шийдвэрлэх гарц нь дотооддоо газрын тос боловсруулах үйлдвэр барих юм. Засгийн газрын ээлжит хуралдаанаар Хэнтий аймгийн Бор-Өндөр суманд жилд 2.5 сая тонн шатахуун үйлдвэрлэх хүчин чадал бүхий боловсруулах үйлдвэр, дамжуулах хоолой барих шийдвэр гаргасан талаар Аж үйлдвэрийн сайд Д.Эрдэнэбатад мэдээлсэн.

Энэ оны 3, 4 дүгээр улиралд багтаан боловсруулах үйлдвэрт хөрөнгө оруулах үндэсний компанийн оролцсон консорциумыг сонгон, уралдаант шалгаруулалт зохион байгуулах, тус төслийн концесс олгох уралдаант шалгаруулалтын хэлэлцээ хийж, ТЭЗҮ, хөрөнгө оруулагчдаа тогтоох аж. Улмаар 2016 онд багтаан Газрын тосны боловсруулах үйлдвэрийн барилгын ажлыг эхлүүлэх бөгөөд бүтээн байгуулалт нийт 4 жил үргэлжлэх юм.

Газрын тос боловсруулах үйлдвэр барихад энэ чиглэлээр мэргэшсэн боловсон хүчин шаардлагатай гэдгийг МҮХАҮТ-ын Ерөнхийлөгч Б.Лхагважав онцлон тэмдэглэв.

Тэрбээр, “Өнгөрсөн хугацаанд газрын тосны салбарт нийт 1200 орчим мэргэжилтэн бэлтгэгдсэн. Гэвч дотооддоо боловсруулах үйлдвэр байхгүй тул мэргэжилтнүүд бодит орчинд буюу үйлдвэр дээр ажиллаж сураагүй. Тиймээс боловсруулах үйлдвэрийг ажиллуулж эхлэхдээ гадаадаас ажиллах хүч, мэргэжилтэн авч, дотоодын мэргэжилтнүүдээ сургах, дадлагажуулах шаардлага үүснэ” хэмээв.

Монгол Улсад одоогоор газрын тосны баталгаажсан 332.64 сая тонн нөөц бий. Өнгөрсөн хугацаанд “Дархан-ГТБҮ”, “Эм ойл энд Жи”, “Сүмбэр Ойл”, “Сод Монгол групп” зэрэг 10 аж ахуйн нэгж газрын тосны үйлдвэр барих зөвшөөрөл авсан хэдий ч үйл ажиллагааг эхлүүлэхгүй байсаар өнөөг хүрсэн. Газрын тосны нөөц тогтоох, судалгаа хийх нь цаг хугацаа шаарддаг тул компаниуд үйл ажиллагаагаа эхлүүлж чадахгүй байгааг “МГТБҮХ”-ын Ерөнхийлөгч Х.Бадамсүрэн хэллээ.

Ч.Ариунболд

Гэрэл зургийг Т.Чимгээ

Холбоотой мэдээ