Улаанбаатар
“Avatar 2” 2022 оны хамгийн их ашиг орлоготой кино болжээ
ДЭЛХИЙН МЭДЭЭ | СОЁЛ УРЛАГ
ВАШИНГТОН. /CNBC/. Америкийн алдарт жүжигчин Том Крузын тоглосон “Top
Gun: Maverick” уран сайхны кино 2022
онд ашиг орлогоороо “Jurassic
World”, “Minions” болон “Marvel” студийн гурван киноны амжилтыг хялбархан
гүйцэж түрүүлсэн ч Канадын найруулагч Жеймс Камероны уран бүтээлийг илүүрхэж чадсангүй.
Тодруулбал, “Avatar:
The Way of Water” кино дэлхий дахины кинотеатруудын дэлгэцнээ гарч эхэлсэн гурав дахь долоо хоногтоо “Maverick”-ийн 2022 онд тогтоогоод байсан амжилтыг эвдэж, 12
дугаар сарын 16-ны өдрөөс хойш дэлхийн зах зээлээс 1.51 тэрбум ам.долларын орлого олоод
байгааг “Box Office Mojo” цахим хуудасны мэдээлэл харуулжээ.
Ингэснээр “Avatar 2” 2022 оны хамгийн их ашиг орлоготой
кино болж, бүх цаг үеийн хамгийн их ашиг орлого олсон кинонуудын жагсаалтын
эхний 10-т бичигдэж эхэлжээ. Харин 2015 онд үзэгчдийн хүртээл болсон “Furious
7” уран сайхны кино 11 дүгээр байр
луу ухарсан байна.
Соёл урлагийн салбарын шинжээчдийн хувьд, “Avatar”-ын шинэ ангийг ойрын хугацаанд эрчээ алдахгүй гэж таамаглаж байгаа бөгөөд ирэх сард “Ant-Man and the Wasp: Quantumania” киног нээлтээ хийх хүртэл тасалбарын борлуулалтаараа тэргүүлсэн хэвээр байна гэсэн таамаглалыг дэвшүүлж байгаа ажээ.
Энэхүү киног
нээлтээ хийхийн өмнөхөн өгсөн ярилцлагадаа “зардлаа нөхөхийн тулд наад зах нь 2
тэрбум ам.долларын орлого олох шаардлагатай” гэж хэлж байсан Ж.Камероны хувьд энэ
нь таатай мэдээ юм. Ийнхүү түүний найруулсан “Avatar”-ын эхний анги (2.92 тэрбум ам.доллар), “Titanik” (2.2 тэрбум ам.доллар) гэсэн гурван кино
нь дэлхийн хамгийн их ашиг орлого олсон 10 кинонд багтсан амжилт үзүүлж байна.
