Улаанбаатар
Оросын “Союз МС-04” сансрын хөлөг амжилттай газардлаа
ДЭЛХИЙН МЭДЭЭ | НИЙГЭМАСТАНА. /TASS/. Оросын “Союз МС-04” сансрын хөлөг ням гарагт Казакстан улсын нутаг дэвсгэрт амжилттай газардлаа.
Олон Улсын Сансрын Станцад /ОУСС/ 136 хоногийн хугацаанд 50 гаруй чухал туршилт хийх үүрэгтэй явсан Оросын 1, Америкийн 2 сансрын нисгэгч бүхий хамтарсан баг эх дэлхийдээ ийнхүү эсэн мэнд иржээ. Тэдний биеийн байдал хэвийн байна гэж АНУ-ын Агаарын нислэг, сансрын уудмыг шинжлэн судлах үндэсний төвийн /НАСА/ телевизээр дамжуулан үзүүлжээ.
Дэлхийн хамгийн туршлагатай, ахмад сансрын нисгэгч эмэгтэй Пегги Уитсон нь ОУСС-д 10 сар байсан бол, НАСА-гийн сансрын нисгэгч Жэк Фишер болон Оросын сансрын нисгэгч Фёдор Юрчихин нар нь тус тус 5 сар болсон байна. П.Уитсон нь Америкийн сансрын нисгэгчдийн дотроос сансарт хамгийн удаан хугацаагаар ажилласан хүн болж дээд амжилт тогтоогоод байгаа юм.
ОУСС-д одоогоор 3 сансрын нисгэгч ажиллаж байгаа бөгөөд энэ сарын сүүлээр буюу 9 дүгээр сарын 13-ны өдөр Казахстаны “Байконур” сансрын буудлаас “Союз МС-06” сансрын хөлгөөр Оросын 1, НАСА-гийн 2 сансрын нисгэгч ОУСС-ыг зорин хөөрөх хуваарьтай байна.
Одоогийн байдлаар Оросын сансрын хөлгүүд нь ОУСС-руу явах үндсэн үүргийг гүйцэтгэн ажиллаж байгаа юм.
Х.Сарнай
