2050 он гэхэд дэлхийн нийт цахилгаан эрчим хүчний 25 хувийг цөмийн эрчим хүчээр хангана

МОНГОЛЫН МЭДЭЭ | ЭДИЙН ЗАСАГ
dogsom@montsame.mn
2018-05-15 18:04:33
Сочи /МОНЦАМЭ/. Цөмийн гэх тодотголтой бүхэн бидний болгоомжлолыг төрүүлдэг. Иймдээ ч цөмийн эрчим хүчний салбарт тулгардаг гол бэрхшээлүүдийн нэг нь олон нийтийн сөрөг хандлага байдаг. Энэ өдрүүдэд ОХУ-ын Сочид болж буй АТОМЭКСПО олон улсын форум&үзэсгэлэнгийн үеэр яг энэ сэдвийг хөндсөннь цөмийн салбарын талаарх сөрөг хандлагын асуудал зөвхөн Монголд байдаггүйг харуулж байна.
"Олон нийтийн дэмжлэг: Дэлхий цөмийн эрчим хүчний салбарыг 2050 он гэхэд хүлээн зөвшөөрөх үү?” сэдэвт хэлэлцүүлэг форумын эхний өдөр буюу 5 дугаар сарын 14-нд болсон.
Аливаа улсад цөмийн цахилгаан станц барих, энэ чиглэлийн төсөл хэрэгжүүлэхэд олон нийтийн зүгээс эсэргүүцэлтэй тулгардаг бөгөөд энэ бэрхшээлийг хэрхэн амжилттай даван туулах талаар хэлэлцүүлгийн оролцогчид санал бодлоо солилцов.
“Росатом” корпорацийн тэргүүн дэд захирал Кирилл Комаров хэлэлцүүлэгт оролцож, олон нийтийн сөрөг хандлагыг өөрчлөхийн тулд тус компани үйл ажиллагаандаа ямар зарчим баримталдаг тухай ярив.
Тэрбээр хэлэхдээ, “Олон нийтийн сөрөг хандлагыг хэрхэн өөрчлөх вэ гэдэг асуултад “Росатом” корпораци аль хэдийн хариулсан. Нэгдүгээрт, үйл ажиллагааны нээлттэй байдлыг сайтар хангаж ажиллах нь чухал. Нээлттэй зарчмынхаа хүрээнд “Росатом” корпораци 18 мэдээллийн төвийг Орост болон бусад оронд байгуулсан. Бид аль нэг улсад томоохон төсөл хэрэгжүүлэх, тухайлбал цөмийн цахилгаан станц барих үйл ажиллагаагаа мэдээллийн төв байгуулахаас эхэлдэг. Яагаад гэвэл хүмүүст нэн түрүүнд мэдээлэл хэрэгтэй. Мэдээллээ нээлттэй хүргэхгүй бол олон нийтийн дунд айдас, эргэлзээ төрж, цуурхал тархах үндэс болдог. Оросын жишээг аваад үзье.Оросын хүн амын 70 гаруй хувь нь цөмийн эрчим хүчний салбарыг дэмждэг бөгөөд энэ нь салбарыг хөгжүүлэх боломжийг бидэнд олгодог. Хамгийн сонирхолтой нь цөмийн байгууламж, цахилгаан станцтай хамгийн ойр байрлаж буй хот суурингийн иргэдийн 90 гаруй хувь нь салбарын тухай эерэг хандлагатай байдаг. Яагаад гэвэл тэдгээр хүмүүс салбарын болоод бидний үйл ажиллагааны тухай хангалттай мэдээлэл, ойлголтыг олж авсан байдаг. Хоёрдугаарт, олон нийтийн сөрөг хандлагыг өөрчлөхийн тулд хүмүүсийн бодит хэрэгцээ юу байгааг ойлгох хэрэгтэй. Орон нутагт юу хэрэгтэй байгааг мэдэж, тэр хэрэгцээг хангах чиглэлээр ажиллаж байж харилцан ашигтай түншлэлийг хөгжүүлж чадна. Оршин суугчид, цөмийн цахилгаан станц барьж буй талуудын нөхөрсөг түншлэл олон нийтийн хандлагыг өөрчлөөд зогсохгүй, төслийн нийт үр бүтээмжийг дээшлүүлэх ач холбогдолтой байдаг” гэсэн юм.
Харин Дэлхийн цөмийн энергийн холбооны “Harmony” зорилтот хөтөлбөрийн зөвлөх Жереми Гордон хэлэлцүүлэгт оролцон, цөмийн эрчим хүчний салбар цаашид цэцэглэн хөгжихэд олон нийтийн дэмжлэг зайлшгүй хүчин зүйл болохыг онцолсон юм. Тэрбээр “Цөмийн эрчим хүчний салбарт амжилттай ажиллах тулгуур хүчин зүйлүүд бол олон нийтийн эерэг хандлага, аюулгүй ажиллагаа юм” гэлээ.
“Harmony” хөтөлбөрийн хүрээнд 2050 он гэхэд дэлхийн нийт цахилгаан эрчим хүчний 25 хувийг цөмийн эрчим хүчээр хангах зорилт тавьжээ. Одоогийн байдлаар дэлхийн 30 орон цөмийн эрчим хүч ашигладаг бөгөөд нийт цахилгаан эрчим хүчний 11 хувийг цөмийн эрчим хүч бүрдүүлж байна.
Мөн Финляндын “Fennovoima”компанийн төслийн захирал Минна Форсстрём тус компани хэрхэн олон нийтийн хандлагыг эерэгжүүлсэн туршлагаас хуваалцсан юм. Тус компани Финляндын Пюхяйоки мужид “Ханхикиви Цөмийн цахилгаан станц”-ын төслийг 2009-2024 онд хэрэгжүүлж байгаа юм.
Пюхяйоки мужийн иргэдийн 75 хувь нь одоо уг төслийг дэмжиж буйг тэрбээр тэмдэглэж, энэ үр дүнд хүрэхийн тулд төсөлд оролцогч бүх талууд буюу хувьцаа эзэмшигчид, компанийн ажилчид, төслийг гүйцэтгэгч, дэд компаниуд, ханган нийлүүлэгчид, хөдөлмөрийн байгууллагууд, эрчим хүчний салбарын бусад аж ахуйн нэгжүүд, хэвлэл мэдээллийн хэрэгсэл, боловсролын байгууллагууд, шийдвэр гаргах түвшний төрийн байгууллагууд, орон нутгийн иргэд, олон нийт болон төрийн бус байгууллагуудтай байнгын харилцаа тогтоож, хамтран ажилласан гэв.
Түүнчлэн, дугуй ширээний хэлэлцүүлэгт Аргентин, Унгар, Кени, Гана, Филиппин улсын төлөөлөл оролцож, өөрсдийн туршлагыг хуваалцсан юм.
АТОМЭКСПО олон улсын хурал &үзэсгэлэн 5 дугаар сарын 16-нд дуусах юм.
Х.Амина
Холбоотой мэдээ