Хот хоорондын нийтийн зорчигч тээврийн үйлчилгээ маргаашаас эхэлнэ
ОРОН НУТГИЙН МЭДЭЭ | ГОВЬ-АЛТАЙГовь-Алтай /МОНЦАМЭ/. Говь-Алтай-Улаанбаатар-Говь-Алтай чиглэлийн хот хоорондын нийтийн зорчигч тээврийн үйлчилгээ гуравдугаар сарын 3-ны өдрөөс эхэлнэ.
Улсын Онцгой комиссын болоод Засгийн газрын шийдвэрийн дагуу хот хоорондын автозамын хөдөлгөөн нээгдсэнтэй холбоотойгоор дээрх чиглэлийн зорчигч тээврийн үйлчилгээ маргаашаас эхэлнэ хэмээн Говь-Алтай аймгийн Автотээврийн төвөөс мэдээллээ. Иймд иргэд, зорчигчдыг халдвар хамгааллын дэглэмийг сайтар сахиж үйлчлүүлэхийг анхаарууллаа. Эхний автобус гуравдугаар сарын 3-ны 15:00 цагт тээвэрлэлт хийнэ. Үүнтэй холбоотойгоор хэд хэдэн зөвлөмжийг хүргэсэн юм.
- Говь-Алтай-Улаанбаатар чиглэлд зорчих иргэд Автотээврийн төвийн кассаар үйлчлүүлж, тасалбар бичүүлнэ.
- Улаанбаатар-Говь-Алтай чиглэлд зорчих иргэд https://www.transdep.mn/ сайтаар хандаж тасалбар бичүүлнэ.
- Улаанбаатар-Говь-Алтай чиглэлд зорчих иргэд PCR шинжилгээнд хамрагдаж, 72 цагийн дотор зорчино.
- 18 хүртэлх насны хүүхэд заавал эцэг эх, асран хамгаалагчийн хамт зорчино.
- Тасалбар бичүүлэх зорчигч иргэний үнэмлэх бичиг баримттай ирнэ.