Ulaanbaatar
Тусгай хэрэгцээт хүүхдүүдэд зориулсан ангитай цэцэрлэг ашиглалтад орлоо
ОРОН НУТГИЙН МЭДЭЭ | ОРХОН
Орхон/МОНЦАМЭ/. Баян-Өндөр сумын Баянбулаг багийн 18 дугаар цэцэрлэгийн өргөтгөл болох 27 дугаар цэцэрлэг ашиглалтад орлоо. Нийт 150 хүүхдийн багтаамжтай уг цэцэрлэгийг 2018 оноос “Бодь хангай” ХХК улсын төсвийн 1.4тэрбум төгрөгийн хөрөнгөөр барьж, өнгөрсөн онд дуусгасан ч цар тахлын улмаас нээлтээ хийж чадаагүй юм.
Орхон аймаг халдварын голомтоо хумиж чадсан тул ийнхүү цэцэрлэгийн нээлтийг өнөөдөр хийлээ. Тус цэцэрлэг мөн тусгай хэрэгцээт хүүхдийн анги нээсэн бөгөөд сэргээн засалч эмч хүүхдүүдэд хөдөлгөөн, бариа засал, асаргаа, сувилгаа хийх юм. Багш нар нь хоёр жилийн турш тусгай хэрэгцээт хүүхдүүдэд боловсрол олгох сургалтад хамрагдаж мэргэшсэн байна. Цаашид хөгжлийн бэрхшээлтэй хүүхдүүдийн сургалтын хэрэглэгдэхүүн, зарим тоног төхөөрөмж шаардлагатай байгаа тул нээлтэд оролцсон аймгийн удирдлагууд болон УИХ-ын гишүүн Д.Батлутад хандаж шийдвэрлэж өгөхийг хүссэн юм.
Дээрх цэцэрлэг
ашиглалтад орсноор найман ажлын байр бий боллоо. Мөн Баянбулаг, Булаг,
Цагаанчулуут багийн хүүхдүүд тус цэцэрлэгт хамрагдана.
