ОХУ Энэтхэгийн газрын тосны хоёр дахь том нийлүүлэгч болжээ

ДЭЛХИЙД | ЭДИЙН ЗАСАГ
Jargal.d@montsame.mn
2022-10-04 14:32:48

ШИНЭ ДЕЛИ. /TASS/. ОХУ-аас импортолсон Энэтхэгийн газрын тосны хэмжээ есдүгээр сард 18 гаруй хувиар өсөж, ОХУ Өмнөд Азийн энэ улс руу газрын тос нийлүүлэгч хоёр дахь том улс болжээ. 


Энэ талаар “The Economic Times” сонин ачаа тээврийн хяналтын “Vortexa” компанийн мэдээллээс эш татан мэдээлсэн байна. 


Эдгээр мэдээллээс үзэхэд Орос улс Энэтхэгт нийлүүлсэн газрын тосны хэмжээгээр Саудын Арабын дараа хоёрдугаарт орж байна. Энэтхэгийн газрын тос боловсруулагчид өнгөрсөн сард өдөрт 879 мянган торх газрын тос импортолж, ОХУ-аас газрын тосны худалдан авалтын хэмжээ 18.5 хувиар өсжээ. 


Сонины шинжээчдийн тэмдэглэснээр, “дотоодын эрэлт улирлын чанартай өсдөгөөс шалтгаалан Энэтхэг улс энэ улиралд Оросын газрын тосыг илүү их худалдан авч магадгүй". Үүнээс гадна, “Европын Холбоо 12 дугаар сараас Оросын газрын тосны импортыг хориглоно гэсэн амлалтаа биелүүлбэл Энэтхэгийн түүхий газрын тосны зах зээлд эзлэх Оросын хувь хэмжээ цаашид ч өсөх магадлалтайг” шинжээчид тэмдэглэсэн байна.


Энэтхэг газрын тосны хэрэгцээнийхээ 85 хувийг импортоор хангадаг. 2021 онд тус улсад энэ түүхий эдийн гол нийлүүлэгч нь Ирак, Саудын Араб байсан бол ОХУ нийлүүлэлтээрээ есдүгээрт жагсаж байв.


Related news