Ulaanbaatar
Чингэлгийн түгжрэлийг арилгахын тулд 2 дахь гарцтай болохыг зорьж байна
МОНГОЛЫН МЭДЭЭ | НИЙГЭМ
Улаанбаатар /МОНЦАМЭ/. БНХАУ-ын Тяньжин боомтод үүсдэг чингэлгийн бөөгнөрлийг арилгахын тулд Жинжөү боомтыг ашиглах, үүний тулд зүүн босоо тэнхлэгийн төмөр замаа барьж далайн боомттой холбогдсон 2 дахь гарцтай болохыг чухалчилж байна.
Тяньжин боомтын өрсөлдөгч Жинжөү боомт манай улсаас хамгийн ойр буюу 866 км бөгөөд 3397 мянган метр квадрат агуулах талбайтай, дэлхийн 100 гаруй улс орон, Ази, Америк, Европ, Африк тивийн бүс нутгуудтай навигацийн харилцаатай аж.
Бид энэ
боомтыг ашигласнаар чингэлгийн бөөгнөрөл арилж цаашид тээврийн үнэ буурч, манай, улсын
импортын ачаа маш хурдан ирдэг болно. Тиймээс Чойбалсан-Хөөт-Бичигт,
Сайншанд-Баруун-Урт-Хөөт чиглэлийн төмөр замын төслүүдээ хурдан хэрэгжүүлэх, Бичигт хилийн боомтын нэвтрүүлэх
хүчин чадлыг нэмэх, ачаа
тээврийн терминалуудыг байгуулах
талаар Зам, тээврийн хөгжлийн сайд С.Бямбацогт БНХАУ-ын Жинжөү боомтод ажиллах үеэрээ хэлэлцэж байлаа.
Түүнчлэн, Бичигт
хилийн боомтыг хатуу хучилттай авто замаар холбох зэрэг зүүн бүсийн томоохон
дэд бүтцийн цогц төслүүдээ Жинжөү хоттой хамтран хэрэгжүүлэх чиглэлээр тус
хотын дарга Ван Шиньюй тэргүүтэй төлөөлөгчидтэй уулзаж, хамтран ажиллах
ойлголцолд хүрсныг ЗТХЯ мэдээлэв.
Ази, Европыг холбосон ложистикийн зангилаа Жинжөү боомт нь Ляонин мужийн баруун хэсэгт, Бөхай тэнгисийн баруун хойд хэсэгт оршдог. Жилд 100 сая тн ачаа боловсруулах хүчин чадалтай Хятадын хамгийн хойд талын боомт. Мөн нэг жилд 1 сая 100 мянган чингэлэг боловсруулах хүчин чадалтай аж. Манай улсын хувьд жилдээ 90 мянган ширхэг чингэлэг ачаа импортоор авч 80 мянган чингэлэг буцаадаг юм. Манай импортын ачааны ихэнх дамждаг Тяньжин боомт жилд 500 сая тн ачаа боловсруулдаг.
