Ulaanbaatar
ДУНДГОВЬ: Хичээл, сургалтыг цахим хэлбэрт шилжүүлсэн шийдвэрээ үргэлжлүүлэхээр боллоо
ОРОН НУТГИЙН МЭДЭЭ | ДУНДГОВЬ
Мандалговь, 2025 оны гуравдугаар сарын 18 /МОНЦАМЭ/. Дундговь аймгийн Онцгой комисс энэ сарын 17-нд хуралдаж,
тус аймагт гарсан улаанбурхан өвчний тархалтын нөхцөл байдлыг хэлэлцэн, авах
хариу арга хэмжээний тухай шийдвэр гаргалаа.
Гуравдугаар сарын 15-нд тус өвчний анхны тохиолдол
бүртгэгдсэнээс хойш 17-ны байдлаар 12 тохиолдол болсныг аймгийн ОБГ-аас
мэдээлсэн юм.
Эрүүл мэндийн байгууллага, Халдварт өвчин судлалын
үндэсний төвөөс хийсэн эрсдэлийн үнэлгээгээр өндөр түвшинтэй хэмээн тогтоогдож,
сургууль, цэцэрлэгийн үйл ажиллагааг түр хязгаарлан, цахим хэлбэрт шилжүүлсэн шийдвэрийг
ОК-ын хурлаас хэвээр үргэлжлүүлэхээр болжээ.
Энэхүү үйл ажиллагаатай холбогдуулан тус хурлаас байгууллага,
аж ахуйн нэгжид ариутгал, халдваргүйжүүлэх ажлыг зохион байгуулах, халдварт
өвчнөөс урьдчилан сэргийлэх, вакцинжуулалтад хамруулах нөлөөллийн ажлыг
яаралтай зохион байгуулах, сурталчлан таниулах, ухуулга сурталчилгаа зохион
байгуулах, мэдээ мэдээллийг дамжуулах, улаанбурхан өвчний вакцинжуулах цэгийн
тоог нэмэгдүүлэх, цэгүүдийн халдвар хамгаалалтад хяналт тавих, вакцинжуулах
ажлыг эрчимжүүлэх, өвчний тандалт судалгааг яаралтай, үр дүнтэй зохион байгуулах зэрэг 17
заалт бүхий шийдвэрийг гаргасан байна.
Түүнчлэн сургууль,
цэцэрлэгийн үйл ажиллагааг цахим хэлбэрт шилжүүлсэнтэй холбогдуулан хүүхэд
хараа хяналтгүй орхигдох нөхцөл байдал байгаа тул эцэг эх, асран хамгаалагчдын ажлын цагт зохицуулалт хийж,
шаардлагатай тохиолдолд цахимаар ажиллах нөхцөл боломжийг бүрдүүлэх, эцэг эх,
асран хамгаалагчдад заавар, зөвлөмж хүргэх, Эрүүл мэндийн байгууллагын бэлтгэл,
бэлэн байдлыг хангах, эм, эмнэлгийн хэрэгслийн нөөцийг бүрдүүлэх, хичээл,
сургалтын үйл ажиллагаанд хяналт тавих, шаардлагатай зардлыг аймгийн Засаг
даргын нөөц хөрөнгөнөөс гаргахаар шийдвэрлэжээ.
